നയ്പിഡാവ്: മ്യാന്‍മറിലുണ്ടായ ഭൂകമ്പത്തില്‍ മരണം 1000 കടന്നു. ഇന്നലെ 7.7 തീവ്രത രേഖപ്പെടുത്തിയ ഭൂകമ്പത്തില്‍ പരിക്കേറ്റവരുടെ എണ്ണം 1000 ആയി. മരണസംഖ്യ ഉയരാനാണ് സാധ്യത. രക്ഷാപ്രവര്‍ത്തനം പുരോഗമിച്ചുകൊണ്ടിരിക്കുകയാണ്. മരണസംഖ്യ 10,000 കവിയുമെന്ന് ഒരു യുഎസ് ഏജന്‍സി മുന്നറിയിപ്പ് നല്‍കി.
വെള്ളിയാഴ്ചയുണ്ടായ ഭൂചലനം മ്യാന്‍മറിനെ അടിമുടി തകര്‍ത്തുകളഞ്ഞു. 900 കിലോമീറ്റര്‍ അകലെ സ്ഥിതി ചെയ്യുന്ന ബാങ്കോക്കില്‍ പോലും അതിന്റെ ആഘാതം അനുഭവപ്പെട്ടു. രാജ്യത്തെ പ്രശസ്തമായ കെട്ടിടങ്ങളും പാലങ്ങളും തകര്‍ന്നുതരിപ്പണമായി. മേഘാലയ, മണിപ്പൂര്‍ എന്നിവയുള്‍പ്പെടെ ഇന്ത്യയുടെ ചില ഭാഗങ്ങളിലും ബംഗ്ലാദേശിലും പ്രത്യേകിച്ച് ധാക്ക, ഛട്ടോഗ്രാം എന്നിവിടങ്ങളിലും ചൈനയിലും ശക്തമായ ഭൂചലനം അനുഭവപ്പെട്ടു. ഭൂകമ്പത്തില്‍ മരിച്ചവരുടെ എണ്ണം 1,002 ആയി ഉയര്‍ന്നതായും 2,376 പേര്‍ക്ക് പരിക്കേറ്റതായും മ്യാന്‍മര്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു.
അത്യധികം പേടിപ്പെടുത്തുന്ന അനുഭവങ്ങളാണ് ദുരന്തത്തില്‍ നിന്നും രക്ഷപ്പെട്ടവര്‍ക്ക് പറയാനുള്ളത്. പലരും തകര്‍ന്നുവീണ കെട്ടിടാവശിഷ്ടങ്ങള്‍ക്കിടയില്‍ നിന്നും എങ്ങനെ രക്ഷപ്പെട്ടുവെന്ന് ഭീതിയോടെ ഓര്‍ക്കുന്നു. മ്യാന്‍മറിന് സഹായഹസ്തവുമായി ഇന്ത്യയടക്കമുള്ള രാജ്യങ്ങള്‍ രംഗത്തെത്തിയിട്ടുണ്ട്. സോളാര്‍ വിളക്കുകള്‍, ഭക്ഷണ പാക്കറ്റുകള്‍, അടുക്കള സെറ്റുകള്‍ എന്നിവയുള്‍പ്പെടെ 15 ടണ്‍ ദുരിതാശ്വാസ വസ്തുക്കള്‍ ഇന്ത്യയുടെ ഐഎഎഫ് സി 130 ജെ വിമാനം മ്യാന്‍മറിലേക്ക് പറന്നു. ദുരന്തബാധിതരെ സഹായിക്കുന്നതിനുള്ള ദൗത്യം ‘ഓപ്പറേഷന്‍ ബ്രഹ്‌മ’ ആരംഭിച്ചതായി വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാള്‍ പ്രതികരിച്ചു.
