മുല്ലപ്പെരിയാര് കേസ് സുപ്രീംകോടതി ഇന്ന് വീണ്ടും പരിഗണിക്കാനിരിക്കെ, സംസ്ഥാന സര്ക്കാര് സത്യവാങ്മൂലം സമര്പ്പിച്ചു.ഒക്ടോബര് 30 വരെ അണക്കെട്ടിലെ ജലനിരപ്പ് 138 അടിയായി ഉയര്ത്താമെന്നാണ് തമിഴ്നാട് തയ്യാറാക്കിയ റൂള് കര്വില് വ്യക്തമാക്കിയത്. എന്നാല് ഇത് സ്വീകാര്യമല്ലെന്ന് സംസ്ഥാന സര്ക്കാര് അറിയിച്ചു. മുല്ലപ്പെരിയാറില് പരമാവധി ജലനിരപ്പ് 142 അടിയായി ഉയര്ത്താമെന്ന് മേല്നോട്ട സമിതി സുപ്രീംകോടതിയില് നല്കിയ റിപ്പോര്ട്ടില് സൂചിപ്പിച്ചിരുന്നു. എന്നാല് ജലനിരപ്പ് 142 അടിയായി ഉയര്ത്തരുതെന്ന് കേരളം ആവശ്യപ്പെട്ടു. സംസ്ഥാനത്തിന്റെ ആശങ്ക മേല്നോട്ട സമിതി പരിഗണിച്ചില്ലെന്ന് കേരളം സത്യവാങ്മൂലത്തില് വ്യക്തമാക്കി. സംസ്ഥാന സര്ക്കാരിന് വേണ്ടി സ്റ്റാന്ഡിങ് കോണ്സല് പ്രകാശ് ആണ് സുപ്രീംകോടതിയില് പുതിയ സത്യവാങ്മൂലം സമര്പ്പിച്ചത്. അണക്കെട്ടിന് എന്തെങ്കിലും സംഭവിച്ചാല് അഞ്ചു ജില്ലകളിലെ 30 ലക്ഷത്തോളം ജനങ്ങളെ ബാധിക്കുന്ന വിഷയമാണ്. ആ ആശങ്ക സുപ്രീംകോടതിയും മേല്നോട്ട സമിതിയും പരിഗണിക്കണം. ഇതിന്റെ അടിസ്ഥാനത്തില് സംസ്ഥാനം തയ്യാറാക്കിയ റൂള് കര്വിന്റെ അടിസ്ഥാനത്തില് ജലനിരപ്പ് ക്രമീകരിക്കണമെന്നും സംസ്ഥാന സര്ക്കാര് റിപ്പോര്ട്ടില് ആവശ്യപ്പെടുന്നു.
അണക്കെട്ട് തുറന്നാല് പെരിയാര് തീരവാസികള്ക്ക് എല്ലാ സുരക്ഷയും ഉറപ്പാക്കുമെന്ന് ജലവിഭവമന്ത്രി റോഷി അഗസ്റ്റിന് പറഞ്ഞു. മുല്ലപ്പെരിയാറില് ഒരു ആശങ്കയും വേണ്ട. എല്ലാ സുരക്ഷാക്രമീകരണങ്ങളും സജ്ജമാക്കിയിട്ടുണ്ട്. ഇരുപതോളം ക്യാമ്പുകള് തയ്യാറാക്കിയിട്ടുണ്ട്. ഒഴുക്കി വിടുന്ന ജലത്തിന്റെ അളവ് അനുസരിച്ച് ജനങ്ങളെ മാറ്റും. ക്യാമ്പുകളും വാഹനങ്ങളും ഉദ്യോഗസ്ഥരും സജ്ജരാണ്. റവന്യൂ, പൊലീസ്, എന്ഡിആര്എഫ് സംഘങ്ങളെല്ലാം സ്ഥലത്ത് ക്യാമ്പു ചെയ്യുന്നുണ്ട്.
തമിഴ്നാട് തയ്യാറാക്കിയ റൂള് കര്വ് സ്വീകാര്യമല്ല;മുല്ലപ്പെരിയാറില് കേരളം പുതിയ സത്യവാങ്മൂലം സമര്പ്പിച്ചു
