കൊട്ടാരക്കര; പാമ്പിനെക്കൊണ്ട് കടിപ്പിച്ച് കൊലപ്പെടുത്തുന്നതിന് മുന്പ് ഉത്രയ്ക്ക് പായസത്തിലും പഴച്ചാറിലും ഉറക്കഗുളിക പൊടിച്ചു ചേര്ത്തു നല്കിയതായി ഭര്ത്താവ് സൂരജ്. ക്രൈംബ്രാഞ്ച് സംഘത്തിനു നല്കിയ മൊഴിയിലാണ് ഇക്കാര്യം പറയുന്നത്. മരുന്നു വാങ്ങിയ അടൂരിലെ കടയില് ഇന്നലെ പൊലീസെത്തി തെളിവെടുപ്പ് നടത്തി. കൊലപാതകശ്രമം നടത്തിയ 2 തവണയും ഗുളിക നല്കിയതായാണു മൊഴി.
മാര്ച്ച് 2 രാത്രിയിലാണ് ഉത്രയ്ക്ക് അണലിയുടെ കടിയേറ്റത്. അന്ന് സൂരജിന്റെ അമ്മ വീട്ടിലുണ്ടാക്കിയ പായസത്തിലാണ് ഉറക്കഗുളിക ചേര്ത്തത്. തുടര്ന്ന് അണലിയെ വിട്ടു ഉത്രയെ കടിപ്പിക്കുകയായിരുന്നു. എന്നാല് ഉത്ര എഴുന്നേറ്റു ബഹളം ഉണ്ടാക്കിയതിനാല് അത് പരാജയപ്പെട്ടു. അടുത്ത ശ്രമത്തില് മേയ് ആറിന് രാത്രിയിലാണ് ഉത്ര കൊല്ലപ്പെടുന്നത്. മൂര്ഖന് പാമ്പിനെക്കൊണ്ട് കടിപ്പിച്ച് കൊലപ്പെടുത്തുകയായിരുന്നു.
