നവീന കണ്ടുപിടുത്തങ്ങളിൽ ദേശീയ നേട്ടവുമായി എൻ. ഐ. ടി. കാലിക്കറ്റ്

കൂട്ടായ പ്രവർത്തനങ്ങൾകൊണ്ടും  നൂതന ആശയങ്ങൾക്കും സംരംഭങ്ങൾക്കുമുള്ള മികച്ച പിന്തുണ കൊണ്ടും ദേശീയ ഇന്നോവേഷൻ റാങ്കിങ്ങിൽ മികച്ച നേട്ടം കൈവരിച്ച് നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജി കോഴിക്കോട്. നാഷണൽ ഇൻസ്റ്റിറ്റ്യുഷണൽ    റാങ്കിങ് ഫ്രെയിംവർക് (എൻ. ഐ.ആർ. എഫ്.) നടത്തിയ ദേശീയ തെരഞ്ഞെടുപ്പിലാണ് എൻ.ഐ.ടി. കോഴിക്കോട് എട്ടാം സ്ഥാനം എന്ന അഭിമാനകരമായ നേട്ടം  കൈവരിച്ചത്.   രാജ്യത്തെ 31 എൻഐടികളിൽ ഇന്നൊവേഷൻ റാങ്കിംഗി ൽ ആദ്യ പത്ത് സ്ഥാനങ്ങളിൽ ഇടം നേടിയ ഏക എൻഐടിയാണ് എൻ.ഐ.ടി. കാലിക്കറ്റ്.
 
കൂട്ടായ പ്രവർത്തനത്തിൻ്റെ ഫലമാണ് എൻ. ഐ. ടി. സി. യുടെ മികച്ച റാങ്ക്. കണ്ടുപിടുത്തങ്ങളെ പ്രോത്സാഹിപ്പിക്കുന്ന എൻ.ഐ.ടി.സി അധ്യാപകരുടെയും വിദ്യാർത്ഥികളുടെയും നൂതന കണ്ടുപിടുത്തങ്ങൾക്കുള്ള  25 പേറ്റന്റുകളും അഞ്ച് ട്രേഡ്മാർക്കുകളും പകർപ്പവകാശ സർട്ടിഫിക്കേഷനുകളും നേടിയിട്ടുണ്ടെന്ന് എൻ.ഐ.ടി.സി ഡയറക്ടർ ഡോ.പ്രസാദ് കൃഷ്ണ പറഞ്ഞു. “2022-23 കാലയളവിൽ പൂർത്തിയാക്കിയ 14 സ്റ്റുഡന്റ് ഇന്നൊവേഷൻ പ്രോജക്ടുകൾക്കുള്ള പേറ്റന്റ് അപേക്ഷകളും സ്ഥാപനം സമർപ്പിച്ചിട്ടുണ്ട്. ഇവയെല്ലാം ഇന്നോവേഷൻ റാങ്കിങ്ങിൽ മികച്ച സ്ഥാനം നേടാൻ സഹായകമായി,” അദ്ദേഹം പറഞ്ഞു.
 
വിദ്യാർത്ഥികളുടെ ഇന്നൊവേഷൻ പ്രോജക്ടുകൾ, അധ്യാപകരുടെ കണ്ടുപിടുത്തങ്ങൾ, ഗവേഷണ സംരംഭങ്ങൾ, സ്റ്റാർട്ടപ്പ് സംരംഭങ്ങൾ, കാമ്പസിലെ ടെക്നോളജി ബിസിനസ് ഇൻക്യൂബേഷൻ (ടി ബി ഐ) സൗകര്യം എന്നിവ പരിഗണിച്ചാണ് എൻ.ഐ.ടി.സി.ക്കു എട്ടാം റാങ്ക് നൽകിയത്.
 
വ്യവസായങ്ങളുമായും ഉന്നത വിദ്യാഭ്യാസ സ്ഥാപനങ്ങളുമായും സഹകരണ പ്രവർത്തനങ്ങൾ പ്രോത്സാഹിപ്പിക്കുന്നതിനായി എൻഐടിസി 32 ലധികം ധാരണാപത്രങ്ങളിൽ ഒപ്പുവച്ചിട്ടുണ്ടെന്നും ഡയറക്ടർ പറഞ്ഞു. ഇൻസ്റ്റിറ്റ്യൂട്ട് ഇന്നൊവേഷൻ കൗൺസിൽ, പേറ്റന്റ് സെൽ, ഡിസൈൻ ഇന്നൊവേഷൻ സെന്റർ, ടി ബി ഐ എന്നിവയുമായി സഹകരിച്ച് വിദ്യാർത്ഥികൾ, അധ്യാപകർ, അനധ്യാപകർ, പൂർവ്വ വിദ്യാർത്ഥികൾ എന്നിവരുടെ കൂട്ടായ പ്രവർത്തനത്തിൻ്റെ ഫലമായാണ് ഏഴ് ഐഐടികൾക്ക് പിന്നിൽ എട്ടാം റാങ്ക് നേട്ടം കൈപ്പിടിയിലാക്കാൻ എൻ ഐ ടി കോഴിക്കോടിന് സാധിച്ചതെന്ന് അദ്ദേഹം കൂട്ടിച്ചേർത്തു.
 
 
 
വിദ്യാർത്ഥികളെ അവരുടെ അക്കാദമിക് കാലയളവിൽ അവരുടെ ഭാവി രൂപപ്പെടുത്താൻ സഹായിക്കുന്നതിനുള്ള എൻഐടിസിയുടെ ശ്രമങ്ങൾ ഇന്നൊവേഷൻ റാങ്കിംഗിൽ പ്രശംസനീയമായ സ്ഥാനം കണ്ടെത്താൻ ഇൻസ്റ്റിറ്റ്യൂട്ടിനെ സഹായിക്കുന്നതിൽ ഒരു പ്രധാന പങ്ക് വഹിച്ചു. ധനസഹായത്തിനും പിന്തുണയ്ക്കുമായി 2022-23 ൽ മാത്രം ഫാക്കൽറ്റി മാർഗ്ഗനിർദ്ദേശം നൽകിയ വിദ്യാർത്ഥികളുടെ 43 നൂതന പ്രോജക്ടുകൾ എൻഐടിസി തിരഞ്ഞെടുത്തു. വിദ്യാർത്ഥികളുടെ ഉൽപ്പന്നങ്ങളും പ്രോട്ടോടൈപ്പുകളും പ്രോത്സാഹിപ്പിക്കാനും  അവർക്കു അവസരങ്ങൾ ഉറപ്പുവരുത്താനും  കണ്ടുപിടുത്തങ്ങളുടെ എക്‌സ്‌പോയും നടത്താറുണ്ട്.
 
വിദ്യാർത്ഥികളുടെ നൂതന ആശയങ്ങൾ കഴിഞ്ഞ അധ്യയന വർഷത്തിൽ 12 പ്രസിദ്ധീകരണങ്ങൾക്കും മൂന്ന് സ്റ്റാർട്ടപ്പ് സംരംഭങ്ങൾക്കും കാരണമായി. സ്റ്റാർട്ടപ്പുകൾ ആസൂത്രണം ചെയ്യുന്ന സ്റ്റുഡന്റ് ഇന്നൊവേറ്റർമാർക്ക് അവരുടെ ഉൽപ്പന്നങ്ങളും പ്രോട്ടോടൈപ്പുകളും വികസിപ്പിക്കുന്നതിന് കാമ്പസിലെ ടെക്നോളജി ബിസിനസ് ഇൻകുബേറ്റർ (ടി ബി ഐ ) സൗകര്യം ഉപയോഗപ്പെടുത്താം.
സ്റ്റാർട്ടപ്പ് ആയി തുടങ്ങിയ 64 കമ്പനികൾ ഇതിനകം ടി ബി ഐ യിൽ നിന്ന്  ഉൽപ്പന്നങ്ങളും പ്രോട്ടോടൈപ്പുകളും വികസിപ്പിച്ച് സ്വതന്ത്ര കമ്പനികളായി പ്രവർത്തനം ആരംഭിച്ചുകഴിഞ്ഞു. നിലവിൽ 23 സ്റ്റാർട്ടപ്പ് സംരംഭങ്ങൾ ടി.ബി.ഐ. യിൽ ഉണ്ട്.
സൂക്ഷ്മ, ചെറുകിട, ഇടത്തരം സംരംഭ മന്ത്രാലയം, ശാസ്ത്ര സാങ്കേതിക വകുപ്പ്, നിധി-പ്രൊമോഷൻ ആൻഡ് ആക്സിലറേഷൻ ഓഫ് യംഗ് ആൻഡ് ആസ്പയറിങ്  ടെക്നോളജി സംരംഭകർ (നിധി-പ്രയാസ്), ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം എന്നിവയുടെ പിന്തുണയോടെയാണ് നവീകരണ പദ്ധതികൾക്ക് ധനസഹായം നൽകുന്നത്.  കൂടാതെ അധ്യാപകർ, സംരംഭകർ, വ്യവസായികൾ, വിദ്യാർത്ഥികൾ എന്നിവരിൽ സംരംഭകത്വം വളർത്താനും ഉത്പന്നങ്ങൾക്ക് വിപണി കണ്ടെത്താനും നൈപുണ്യ വികസനത്തിനുമായി ഇൻസ്റ്റിറ്റ്യൂട്ട് 37 പരിശീലന പരിപാടികളും നടത്തിയിട്ടുണ്ട്. 
 
എൻ.ഐ.ടി.സി 2015 മുതൽ തന്നെ വിദ്യാർ്‌തഥികളുടെയും അധ്യാപകരുടെയും കണ്ടെത്തലുകളെ പ്രോത്സാഹിപ്പിക്കാൻ പദ്ധതികൾ തുടങ്ങിയിരുന്നു എന്ന് അധ്യാപകർ പറഞ്ഞു. വിദ്യാർത്ഥികളുടെയും അധ്യാപകരുടെയും ഇടയിൽ കണ്ടുപിടുത്തങ്ങളോട് ആഭിമുഖ്യം വളർത്താൻ സ്ഥാപനത്തിൻ്റെ അടിസ്ഥാന സൗകര്യങ്ങൾ, സ്റ്റാർട്ടപ്പുകൾ തുടങ്ങാനുള്ള സൗകര്യങ്ങൾ, പേറ്റൻ്റ സെൽ പ്രവർത്തനം എന്നിവ ഉറപ്പുവരുത്തുന്നുണ്ട്. നവീന ആശയങ്ങളുടെ വാണിജ്യവൽക്കരണം, മറ്റ് ഇൻക്യൂബേഷൻ യൂണിറ്റുകളുമായുള്ള സഹകരണം, സംരംഭകത്വവും ഇന്നൊവേഷനുമായി ബന്ധപ്പെട്ട വിഷയങ്ങളിൽ കോഴ്‌സുകൾ അവതരിപ്പിക്കൽ എന്നിവയിലുള്ള നിരന്തര പരിശ്രമവും ഇന്നോവേഷൻ റാങ്കിങ്ങിൽ മികച്ച സ്ഥാനം നേടാൻ സഹായകമായി എന്നും അവർ കൂട്ടിച്ചേർത്തു.