കറുത്ത വംശജനായ ജോര്ജ് ഫ്ളോയ്ഡിനെ കൊന്ന കേസിലെ മുഖ്യപ്രതിയായ മുന് പൊലീസ് ഉദ്യോഗസ്ഥന് ഡെറക് ചൗവിന് 22 വര്ഷം തടവുശിക്ഷ വിധിച്ചു.
സഹതാപത്തിന്റെയോ വികാരങ്ങളുടെയോ അടിസ്ഥാനത്തിലല്ല നിയമത്തില് മാത്രം ഊന്നിക്കൊണ്ടാണ് ഈ വിധി നടത്തുന്നതെന്നും ജഡ്ജ് പീറ്റര് കാഹില് പറഞ്ഞു.
ഔദ്യോഗികപദവിയുടെ അധികാരവും വിശ്വാസ്യതയും ദുരുപയോഗം ചെയ്തതിനും ജോര്ജ് ഫ്ളോയ്ഡിനോട് ചെയ്ത ക്രൂരതയ്ക്കുമാണ് ഇത്രയും വര്ഷത്തെ തടവുശിക്ഷ വിധിക്കുന്നതെന്ന് കോടതി അറിയിച്ചു.
വിചാരണക്കിടെ ജോര്ജ് ഫ്ളോയ്ഡിന്റെ മരണത്തില് കുടുംബത്തോട് അനുശോചനമറിയിച്ച ഡെറക് മാപ്പ് പറയാന് തയ്യാറായില്ല. നിയമത്തിന്റെ ചില കടമ്പകള് നിലനില്ക്കുന്നതിനാല് തനിക്ക് പ്രസ്താവന മുഴുവന് നല്കാനായില്ലെന്നും ഡെറക് പറഞ്ഞു.
സമീപകാലത്ത് വംശീയതക്കെതിരെ അമേരിക്കയും ലോകവും കണ്ട ഏറ്റവും വലിയ പ്രതിഷേധങ്ങള്ക്ക് വഴിവെച്ച സംഭവമായിരുന്നു ജോര്ജ് ഫ്ളോയ്ഡിന്റെ മരണം.
