കശ്മീരിലെ പുല്വാമയില് സുരക്ഷാസേനയും ഭീകരരും തമ്മിലുണ്ടായ ഏറ്റുമുട്ടലില് രണ്ട് ഭീകരരെ വധിച്ചു. അതിനിടെ അനന്തനാഗിലെ ദേശീയപാതയില് സുരക്ഷയില് ഉണ്ടായിരുന്ന സിആര്പിഎഫ് സംഘത്തെ ഭീകരര് അക്രമിച്ചു. ഒരു സിആര്പിഎഫ് ജവാന് പരുക്കേറ്റു.
കഴിഞ്ഞ ഏതാനും മാസങ്ങളായി കശ്മീരില് ഭീകരവിരുദ്ധ നടപടി സുരക്ഷസേന ശക്തമാക്കിയിരുന്നു. സേനയ്ക്ക് ലഭിച്ച രഹസ്യവിവരത്തെ തുടര്ന്നാണ് മേഖലയില് തെരച്ചില് ആരംഭിച്ചത്. പട്രോളിങ് നടത്തുകയായിരുന്ന സുരക്ഷാ സേനക്ക് നേരെ ഭീകരര് വെടിവെച്ചതോടെ ഏറ്റുമുട്ടല് ആരംഭിച്ചു. വധിച്ച ഭീകരരെ തിരിച്ചറിഞ്ഞിട്ടില്ല. ഏറ്റുമുട്ടല് ഇപ്പോഴും തുടരുകയാണ്. തെരച്ചിലിനിടെ അവന്തിപോരയിലെ ഭീകരരുടെ താവളം സുരക്ഷ സേന കണ്ടെത്തിയിരുന്നു. ഷോപ്പിയാന് , അനന്തനാഗിലെ വനമേഖല എന്നിവിടങ്ങളില് കഴിഞ്ഞ ദിവസം ഭീകരരുമായി ഏറ്റുമുട്ടല് ഉണ്ടായിരുന്നു. ഈ വര്ഷം വിവിധ ഏറ്റുമുട്ടലുകളിലായി കശ്മീരില് 100ല് കൂടുതല് ഭീകരരെയാണ് സുരക്ഷ സേന വധിച്ചത്.
