അടൂര്: ഇന്സ്റ്റഗ്രാമിലൂടെ പരിചയപ്പെട്ട പ്രായപൂര്ത്തിയാകാത്ത പെണ്കുട്ടിയെ ലൈംഗിക പീഡനത്തിനിരയാക്കിയ കേസില് 23കാരന് ജീവപര്യന്തം തടവ്. ഏനാദിമംഗലം മാരൂര് ചാങ്കൂര് കണ്ടത്തില് പറമ്പില് വീട്ടില് അജിത്തിനെയാണ് ശിക്ഷിച്ചത്.
അടൂര് അതിവേഗ സ്പെഷ്യല് കോടതി ജഡ്ജി ഡോണി തോമസ് വര്ഗീസാണ് ശിക്ഷ വിധിച്ചത്. പ്രായപൂര്ത്തിയാകാത്ത കുട്ടിയെ നിരവധി തവണ ലൈംഗിക പീഡനം നടത്തിയതിന് ജീവപര്യന്തം കഠിനതടവും പോക്സോ ആക്ടുകള് പ്രകാരം 26 വര്ഷം തടവും 3,20,000 രൂപ പിഴയുമാണ് ശിക്ഷ. പിഴ അതിജീവിതയ്ക്ക് നല്കണം.
ഇന്സ്റ്റഗ്രാം വഴി പരിചയപ്പെട്ട പെണ്കുട്ടിയെ വീട്ടില് അതിക്രമിച്ചു കയറി പീഡിപ്പിച്ചു എന്നാണ് കേസ്. 2022 ജനുവരി മൂന്നിന് പെണ്കുട്ടിയുടെ വീട്ടില് അതിക്രമിച്ചു കയറിയ പ്രതി മോര്ഫ് ചെയ്ത ഫോട്ടോകള് പ്രചരിപ്പിക്കുമെന്ന് ഭീഷണിപ്പെടുത്തി വീട്ടില് താമസിച്ച് ലൈംഗിക അതിക്രമത്തിന് ഇരയാക്കുകയായിരുന്നു. പ്രതി പെണ്കുട്ടിയെ ഭീഷണിപ്പെടുത്തി പണവും അമ്മൂമ്മയുടെ സ്വര്ണ്ണമാലയും കൈക്കലാക്കി. മാല കാണാത്തതിനെ തുടര്ന്ന് അമ്മൂമ്മ പൊലീസില് പരാതി നല്കിയതിനെ തുടര്ന്നുള്ള അന്വേഷണത്തിലാണ് കുട്ടി കാര്യങ്ങള് വെളിപ്പെടുത്തിയത്.
