കൊച്ചി: കണ്ണൂർ സർവകലാശാല അസോസിയേറ്റ് പ്രൊഫസർ നിയമനത്തിൽ മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ.രാഗേഷിന്റെ ഭാര്യ പ്രിയ വർഗീസിന് ആശ്വാസം. സിംഗിൾ ബെഞ്ച് ഉത്തരവ് ഹൈക്കോടതി ഡിവിഷൻ ബെഞ്ച് റദ്ദാക്കി. കണ്ണൂർ സർവകലാശാലയിൽ അസോ. പ്രഫസർ നിയമനത്തിന് ആവശ്യമായ അധ്യാപന പരിചയം പ്രിയ വർഗീസിന് ഇല്ലെന്ന സിംഗിൾ ബെഞ്ച് ഉത്തരവാണ് ഹൈക്കോടതി റദ്ദാക്കിയത്.
നേരത്തെ, കണ്ണൂര് സര്വ്വകലാശാലയിലെ പ്രിയ വര്ഗീസിന്റെ അസോസിയേറ്റ് പ്രൊഫസര് നിയമനം ഹൈക്കോടതി അസാധുവാക്കിയിരുന്നു. യുജിസി മാനദണ്ഡങ്ങള് പാലിച്ചല്ല പ്രിയവര്ഗീസിന്റെ നിയമനമെന്ന് ചൂണ്ടിക്കാട്ടി രണ്ടാം റാങ്കുകാരനായ ജോസഫ് സ്കറിയ സമര്പ്പിച്ച ഹര്ജിയിലായിരുന്നു ഹൈക്കോടതിയുടെ നിര്ണായക വിധി.
അസോസിയേറ്റ് പ്രൊഫസര് തസ്തികയില് അപേക്ഷിക്കാനുള്ള മിനിമം യോഗ്യതയായ എട്ടു വര്ഷത്തെ അധ്യാപനപരിചയം പ്രിയാ വര്ഗീസിനില്ലെന്നു ചൂണ്ടിക്കാട്ടിയാണു ഹര്ജിക്കാരന് കോടതിയെ സമീപിച്ചത്. പ്രിയ വര്ഗീസിന് അസോസിയേറ്റ് പ്രൊഫസാറായി നിയമിതയാവാനുള്ള യോഗ്യതയില്ലെന്ന് ഹൈക്കോടതി ചൂണ്ടിക്കാട്ടി.
എന്എസ്എസിലെ പ്രവര്ത്തനം അധ്യാപന പരിചയമല്ല. ഗവേഷണകാലം അധ്യാപന പരിചയമായി കണക്കാക്കാനാവില്ല എന്നും കോടതി വ്യക്തമാക്കി. റാങ്ക് പട്ടിക പുനഃക്രമീകരിക്കണം എന്ന ആവശ്യ കോടതി അംഗീകരിച്ചിരുന്നു. പ്രിയ വര്ഗീസിന് അഭിമുഖത്തില് കൂടുതല് മാര്ക്ക് ലഭിച്ചതോടെയാണു ഹര്ജിക്കാരനായ ജോസഫ് സ്കറിയ റാങ്ക് പട്ടികയില് രണ്ടാമതായത്.
2018 ലെ യുജിസി വ്യവസ്ഥ അനുസരിച്ച് റിസര്ച്ച് സ്കോറും അംഗീകൃത പ്രസിദ്ധീകരണങ്ങളും പരിശോധിക്കാതെയാണു വൈസ് ചാന്സലര് അധ്യക്ഷനായ സെക്ഷന് കമ്മിറ്റി മുന്വിധിയോടെയാണു പ്രിയ വര്ഗീസിന് ഇന്റര്വ്യൂവില് കൂടുതല് മാര്ക്ക് നല്കിയതെന്നാണു ഹര്ജിക്കാരന്റെ ആരോപണം.
