തിരുവനന്തപുരം: പി വി അന്വറിന്റെ യുഡിഎഫ് പ്രവേശനമോഹത്തിന് കോണ്ഗ്രസ് ഹൈക്കമാന്ഡിന്റെ പച്ചക്കൊടി. കേരളത്തില് തൃണമൂല് കോണ്ഗ്രസിനെ മുന്നണിയില് ഉള്പ്പെടുത്തുന്നതിന് തടസ്സമില്ലെന്നാണ് ഹൈക്കമാന്റ് കേരള നേതൃത്വത്തെ അറിയിച്ചിരിക്കുന്നത്.
ബംഗാളില് തൃണമൂലിനെതിരെ അരയും തലയും മുറുക്കി കോണ്ഗ്രസ് രംഗത്തുള്ളപ്പോഴാണ് കേരളവുമായി ബന്ധപ്പെട്ട് മറിച്ചൊരു തീരുമാനം കോണ്ഗ്രസ് ഹൈക്കമാന്ഡ് എടുത്തിരിക്കുന്നത്. പ്രാദേശിക സഖ്യങ്ങള്ക്ക് ദേശീയ നിലപാട് ബാധകമല്ല എന്നാണ് ഈ വിഷയത്തില് കോണ്ഗ്രസ് ഹൈക്കമാന്റിന്റെ നിലപാട്. മതേതര പാര്ട്ടികളെ ചേര്ത്ത് നിര്ത്തുന്നതില് തെറ്റില്ലെന്നും ഹൈക്കമാന്ഡ് വിലയിരുത്തി.
നിലമ്പൂര് ഉപതെരഞ്ഞെടുപ്പ് അടുത്തുവരുന്ന പശ്ചാത്തലത്തിലാണ് മുന്നണി പ്രവേശനം വേഗത്തിലാക്കുന്നത്. ഏപ്രില് 24ന് കോണ്ഗ്രസ് നേതാക്കള് പി.വി അന്വറുമായി ചര്ച്ച നടത്തും. പ്രതിപക്ഷ നേതാവ് വി.ഡി സതീശന്റെ നേതൃത്വത്തിലാകും ചര്ച്ച. പ്രതിപക്ഷ നേതാവിന്റെ ഔദ്യോഗിക വസതിയില് നടക്കുന്ന ചര്ച്ചയില് മുന്നണി പ്രവേശനത്തിലെ നിര്ണായക തീരുമാനം ഉണ്ടാകും.
