എന്എസ്എസിനെ വാനോളം പുകഴ്ത്തിയും, എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്റെ വിമര്ശനത്തെ സ്വാഗതം ചെയ്തും പ്രതിപക്ഷനേതാവ് വി ഡി സതീശന്. എന്.എസ്.എസിനോട് തനിക്ക് അകല്ച്ചയില്ലെന്നും സംഘപരിവാറിനെ അകറ്റിനിര്ത്തുന്നതില് മികവ് കാണിക്കുന്ന പ്രസ്ഥാനമാണ് എന്എസ്എസ് എന്നുമാണ് പ്രതികരണം. എന്എസ്എസ് വേദിയില് രമേശ് ചെന്നിത്തലയ്ക്കുള്ള ക്ഷണം കോണ്ഗ്രസിനുള്ള അംഗീകാരമാണ്. തനിക്കെതിരായ വെള്ളാപ്പള്ളി നടേശന്റെ വിമര്ശനത്തെ പോസിറ്റീവായി കാണുന്നെന്നും വി ഡി സതീശന് പറഞ്ഞു.
2026 ല് യുഡിഎഫ് അധികാരത്തില് വരുമെന്ന അഭിപ്രായമാണ് വെള്ളാപ്പള്ളി നടേശന് പങ്കുവച്ചത്. ഏത് നേതാവും സമുദായ സംഘടനകളുമായി ബന്ധപ്പെട്ട് പ്രവര്ത്തിച്ചാല് ഗുണം കോണ്ഗ്രസിനാണ്.കോണ്ഗ്രസ് ഒരു സമുദായത്തെയും മാറ്റിനിര്ത്തില്ല. ശശി തരൂരിനെയും കെ മുരളീധരനെയും എന്എസ്എസ് വിളിച്ചിട്ടുണ്ട്. ശിവഗിരിയിലെ സമ്മേളനത്തില് താന് പങ്കെടുത്തിട്ടുണ്ട്. ക്രൈസ്തവരുടെ പരിപാടികളില് താന് ഇന്നലെയും പങ്കെടുത്തു. സമൂഹത്തിലെ ആരുമായും ഏത് കോണ്ഗ്രസ് നേതാവ് ബന്ധം സ്ഥാപിച്ചാലും തനിക്ക് സന്തോഷമാണെന്ന് അദ്ദേഹം പറഞ്ഞു.
