ചെന്നൈ: തമിഴ്നാട്ടിലെ കള്ളക്കുറിച്ചിയില് വിഷമദ്യ ദുരന്തത്തില് മരിച്ചവരുടെ കുടുംബങ്ങള്ക്ക് തമിഴ്നാട് സര്ക്കാര് 10 ലക്ഷം രൂപ വീതം ധനസഹായം പ്രഖ്യാപിച്ചു. ചികിത്സയില് കഴിയുന്നവര്ക്ക് 50,000 രൂപ അടിയന്തരമായി നല്കും. മരിച്ചവരുടെ എണ്ണം 35 ആയി. വിവിധ ആശുപത്രികളിലായി സ്ത്രീകളടക്കം നിരവധി പേര് ചികിത്സയിലാണ്.
കള്ളക്കുറിച്ചിയിലെ കരുണപുരത്താണ് മദ്യദുരന്തമുണ്ടായത്. പ്രദേശത്ത് വ്യാജമദ്യം വിറ്റ ഗോവിന്ദരാജന് എന്നയാളെ പൊലീസ് അറസ്റ്റ് ചെയ്തു. ഇയാളില്നിന്ന് 200 ലിറ്റര് വ്യാജമദ്യം കണ്ടെടുത്തു. മദ്യത്തില് മെഥനോളിന്റെ അംശം സ്ഥിരീകരിച്ചതായി തമിഴ്നാട് സര്ക്കാര് അറിയിച്ചു. സംഭവത്തില് റിട്ടയേര്ഡ് ജഡ്ജി ബി. ഗോകുല്ദാസിന്റെ നേതൃത്വത്തിലുള്ള ഏകാംഗ കമ്മീഷന് റിപ്പോര്ട്ട് സമര്പ്പിക്കാന് തമിഴ്നാട് മുഖ്യമന്ത്രി എം.കെ സ്റ്റാലിന് ഉദ്യോഗസ്ഥര്ക്ക് നിര്ദേശം നല്കി. മരിച്ചവരുടെ കുടുംബാംഗങ്ങള്ക്ക് 10 ലക്ഷം രൂപ വീതം സഹായം നല്കുമെന്നും മുഖ്യമന്ത്രി അറിയിച്ചു.
