തിരുവനന്തപുരം: ആശാ വര്ക്കര്മാരുടെ സഹനസമരം ഇന്ന് നൂറാം നാളിലേക്ക്. ഇന്ന് വൈകിട്ട് 4.30ന് സമരപ്പന്തലില് പന്തം കൊളുത്തി പ്രതിഷേധിക്കാനാണ് ആശാ പ്രവര്ത്തകരുടെ തീരുമാനം.
സംസ്ഥാന സെക്രട്ടേറിയറ്റിന് മുന്നില് തുടരുന്ന സമരത്തിന് പുറമെ കേരളമാകെ സഞ്ചരിച്ചുള്ള രാപ്പകല് സമരയാത്ര പതിനാറാംദിവസത്തിലേക്ക് കടന്നു. സര്ക്കാരിന്റെ പിടിവാശിക്കെതിരെ സ്ത്രീ തൊഴിലാളികള് നടത്തുന്ന പോരാട്ടം കേരളത്തിലെ സമരചരിത്രത്തിന്റെ ഭാഗമാകുകയാണ്. സര്ക്കാര് ആഘോഷത്തോടെ അഞ്ചാം വര്ഷത്തിലേക്ക് കടക്കുന്ന ദിവസമാണ് ആശമാരുടെ അസാധാരണ സമരം നൂറ് നാള് പിന്നിടുന്നത്.
സെക്രട്ടറിയേറ്റിന് മുന്നിലെ രാപ്പകല് സമരം, അനിശ്ചിതകാല നിരാഹാരസമരം, മുടിമുറിക്കല് സമരം, നിയമസഭാ മാര്ച്ച്, സാംസ്കാരിക നേതാക്കളുടെ സംഗമം, പ്രതിഷേധ പൊങ്കാല, സെക്രട്ടറിയേറ്റ് ഉപരോധം, ഒടുവില് കേരളമാകം നീണ്ടുനില്ക്കുന്ന രാപ്പകല് സമരയാത്ര. സിഐടിയുവിന്റെ സമാന്തര സമരം, ഐഎന്ടിയുസിയുടെ തൊഴിലാളി വിരുദ്ധ നിലപാട്, മഴയത്ത് വലിച്ചുകെട്ടിയ ടാര്പോളിന് ഷീറ്റ് വരെ വലിച്ചുമാറ്റിയുള്ള പൊലീസ് നടപടികള്. ഒന്നിലും പതറാതെയാണ് ആശ സമരം മുന്നോട്ട് പോകുന്നത്.
