തിരുവനന്തപുരം: പേരിലെ സസ്പെന്സ് അവസാനിച്ചു, സര്ക്കാര് ഉത്പാദിപ്പിക്കുന്ന പുതിയ ബ്രാന്ഡിയുടെ പേര് പുറത്തുവിട്ടു. ‘മലബാര് മിസ്റ്ററി’ എന്നാണ് പുതിയ ബ്രാന്ഡിന് പേര് നല്കിയിരിക്കുന്നത്. ഫെബ്രുവരി 21ന് മന്ത്രി എം ബി രാജേഷ് പേര് ഔദ്യോഗികമായി പ്രഖ്യാപിക്കും. പാലക്കാട് മലബാര് ഡിസ്റ്റിലറിയില് ഉത്പാദിപ്പിക്കുന്ന ബ്രാന്ഡിക്കാണ് പേരായിരിക്കുന്നത്. പുതിയ ബ്രാന്ഡ് കുറഞ്ഞ വിലയില് ഈ മാസം 21ന് വിപണിയിലെത്തും.
അതേസമയം മദ്യത്തിന് ഉചിതമായ പേരും ലോഗോയും നിര്ദേശിക്കുന്നവര്ക്ക് 10,000 രൂപ നല്കുമെന്ന ബെവ്കോ പരസ്യം വലിയ വിവാദങ്ങള്ക്ക് കാരണമായിരുന്നു. സര്ക്കാര് മദ്യ ഉപഭോഗം പ്രോത്സാഹിപ്പിക്കുന്നുവെന്ന് ചൂണ്ടിക്കാണിച്ച് ഹര്ജി സമര്പ്പിച്ചതിന് പിന്നാലെ സര്ക്കാരിന് ഹൈക്കോടതി നോട്ടീസ് അയക്കുകയും ചെയ്തു. പാലക്കാട്ടെ മലബാര് ഡിസ്റ്റലറീസില് നിന്നും പുറത്തിറക്കുന്ന ബ്രാന്ഡിക്ക് ഉചിതമായ പേരും ലോഗോയും ക്ഷണിച്ച് സര്ക്കാര് പുറത്തിറക്കിയ പരസ്യത്തിനെതിരെയായിരുന്നു ഹൈക്കോടതി നോട്ടീസ് അയച്ചത്. എന്നാല് ഹൈക്കോടതിയുടെ വിമര്ശനത്തിന് പിന്നാലെ പരസ്യം നല്കിയത് തങ്ങളല്ലെന്ന് ബെവ്കോ വ്യക്തമാക്കി. തുടർന്ന് മദ്യത്തിന് പേരിടാനുള്ള പരസ്യം കോടതി സ്റ്റേ ചെയ്തു.
വിഷയത്തില് കേരള സ്റ്റേറ്റ് ബീവറേജസ് കോര്പ്പറേഷന്(ബെവ്കോ) കോടതിയില് സത്യവാങ്മൂലം സമര്പ്പിച്ചിട്ടുണ്ട്. മദ്യത്തിന് പേരിടല് മത്സരത്തെക്കുറിച്ച് തങ്ങള്ക്ക് അറിവോ വിവരമോ ഇല്ലെന്നാണ് ബെവ്കോ കോടതിയെ അറിയിച്ചത്. ബെവ്കോയുടെ വിശദീകരണത്തിന് പിന്നാലെ ഹൈക്കോടതി മലബാര് ഡിസ്റ്റലറീസിനോട് വിശദീകരണം തേടി. എല്ലാ നിയമനടപടികളും സ്റ്റേ ചെയ്ത കോടതി കേസ് കൂടുതല് വാദം കേള്ക്കുന്നതിനായി മാര്ച്ച് 12ലേക്ക് മാറ്റിയിരുന്നു.
