കേന്ദ്രമന്ത്രിസഭ അംഗീകാരം നൽകിയ വനിതാ സംവരണ ബിൽ ഞങ്ങളുടേതെന്ന് വ്യക്തമാക്കി കോൺഗ്രസ് നേതാവ് സോണിയ ഗാന്ധി. പാർലമെൻറിലേക്ക് എത്തുന്നതിനിടെ മാധ്യമപ്രവർത്തകരുടെ ചോദ്യത്തിന് പ്രതികരണം നൽകുകയായിരുന്നു സോണിയഗാന്ധി. ബില്ലിനെ കുറിച്ചുള്ള ചോദ്യത്തിന് വനിതാ സംവരണ ബിൽ ഞങ്ങളുടേതെന്നായിരുന്നു എന്നാണ് സോണിയ ഗാന്ധി നൽകിയ മറുപടി. കേന്ദ്രമന്ത്രിസഭ അംഗീകാരം നൽകിയ വനിതാസംവരണ ബിൽ നാളെ ലോക്സഭയിൽ അവതരിപ്പിക്കുമെന്നാണ് റിപ്പോർട്ട്.അതിനിടെ, സംവരണത്തിനകത്ത് സംവരണം വേണമെന്ന് ജെഎംഎം പറഞ്ഞു. വനിത സംവരണ ബില്ലിൽ എസ്സി, എസ്ടി, ഒബിസി വനിതകൾക്ക് സംവരണം വ്യവസ്ഥ ചെയ്യണമെന്ന് ജെഎംഎം ആവശ്യപ്പെട്ടു. അല്ലെങ്കിൽ മുന്നോക്ക വിഭാഗത്തിൽ നിന്നുള്ള സ്ത്രീകൾക്ക് മാത്രമായിരിക്കും നേട്ടമുണ്ടാകുകയെന്ന് എംപി മഹുവ മാജി പറഞ്ഞു. വനിത സംവരണ ബിൽ നീണ്ട കാലത്തെ ആവശ്യമായിരുന്നുവെന്ന് ജെഎംഎം എംപി കൂട്ടിച്ചേർത്തു. അതോടൊപ്പം വനിതാ സംവരണ ബില്ലിനെ സ്വാഗതം ചെയ്ത് ബിആർഎസ് നേതാവ് കെ കവിത രംഗത്തെത്തി. ഏത് രൂപത്തിലാണെങ്കിലും വനിതാ സംവരണബില്ലിനെ ബിആർഎസ് പാർലമെൻറിൽ അനുകൂലിക്കുമെന്ന് കെ കവിത പറഞ്ഞു. എന്താണ് ബില്ലിൻറെ കരട് എന്നോ മുമ്പുള്ള ബില്ലിൽ നിന്ന് മാറ്റങ്ങളുണ്ടോ എന്നും കേന്ദ്ര സർക്കാർ വെളിപ്പെടുത്താത്തത് നിരാശാജനകമാണെന്നും അവർ കൂട്ടിച്ചേർത്തു.
വനിതാ സംവരണ ബിൽ; അത് ഞങ്ങളുടേതായിരുന്നുവെന്ന് സോണിയ ഗാന്ധി
