പ്രണയ പരാജയം സമ്മാനിക്കുന്ന മനക്ലേശം ചെറുതല്ല. എന്നാൽ പ്രണയം പരാജയപ്പെട്ടതു വഴി 25000 രൂപ നഷ്ടപരിഹാരമായി ലഭിച്ചിരിക്കുകയാണ് പ്രതീക് ആര്യൻ എന്ന യുവാവിന്. പ്രണയം ആരംഭിച്ചതു മുതൽ താനും കാമുകിയും ചേർന്ന് ആരംഭിച്ച ‘ഹാർട്ട് ബ്രേക്ക് ഇൻഷുറൻസ് ഫണ്ട്’ ആണിതെന്ന് യുവാവ് പറയുന്നു. ട്വീറ്റിലൂടെയാണ് യുവാവ് തന്റെ അനുഭവം തുറന്നു പറഞ്ഞിരിക്കുന്നത്.
യുവാവിന്റെ കുറിപ്പ് ഇങ്ങനെ- “എന്റെ കാമുകി എന്നെ ചതിച്ചതിനാൽ എനിക്ക് 25000 രൂപ കിട്ടിയിരിക്കുന്നു. ഞങ്ങൾ ബന്ധം ആരംഭിച്ചതു മുതൽ 500 രൂപ വീതം പ്രതിമാസം ജോയിന്റ് അക്കൗണ്ടിൽ നിക്ഷേപിക്കുമായിരുന്നു. ആര് ചതിച്ചാലും ചതിക്കപ്പെടുന്ന ആൾക്ക് പണം മുഴുവൻ എടുക്കാമെന്നായിരുന്നു പോളിസി. അതാണ് ‘ഹാർട്ട് ബ്രേക്ക് ഇൻഷുറൻസ് ഫണ്ട്’ യുവാവ് ട്വീറ്റ് ചെയ്തു.
നിരവധി ഉപയോക്താക്കൾ രസകരമായ കമന്റുകൾ പങ്കുവെച്ചതോടെ ട്വീറ്റ് വൈറലായി. എന്നാൽ യുവാവിന്റെ ട്വീറ്റിന്റെ ഉള്ളടക്കത്തെ സംശയത്തോടെ കാണുന്നവരുമുണ്ട്. മിക്ക ആളുകളും ഇത് മികച്ച ആശയമാണെന്നാണ് അഭിപ്രായപ്പെട്ടിരിക്കുന്നത്. നിരവധിപ്പേർ ഈ ആശയം പരീക്ഷിക്കാൻ സന്നദ്ധത പ്രകടിപ്പിച്ചിട്ടുണ്ട്.
