കൊച്ചി: എം.ടി വാസുദേവൻ നായരും വി എ ശ്രീകുമാറും തമ്മിലുളള രണ്ടാമൂഴം കേസ് ഒത്തുതീർപ്പിലേക്ക്.
തിരക്കഥ എം ടിക്ക് തിരികെ നൽകും. കഥയുടെയും തിരക്കഥയുടെയും പൂർണ അവകാശം എം ടിക്കായിരിക്കും.
2014ലായിരുന്നു എം ടിയും വി എ ശ്രീകുമാറും രണ്ടാമൂഴം സിനിമയാക്കാൻ കരാറിലൊപ്പിട്ടത്. മൂന്നു വർഷത്തിനുളളിൽ സിനിമ പൂർത്തിയാക്കുമെന്നായിരുന്നു കരാറെങ്കിലും കാലാവധി കഴിഞ്ഞിട്ടും സിനിമ യാഥാർത്ഥ്യമായില്ല. ഇതേ തുടർന്ന് വി എ ശ്രീകുമാർ രണ്ടാമൂഴം സിനിമയാക്കുന്നത് തടയണമെന്ന് ആവശ്യപ്പെട്ട് എം ടി കോടതിയെ സമീപിക്കുകയായിരുന്നു
നിലവിൽ വി എ ശ്രീകുമാറിന് മഹാഭാരതത്തെക്കുറിച്ച് സിനിമ ചെയ്യാം. പക്ഷെ രണ്ടാമൂഴത്തെക്കുറിച്ച് സിനിമ ചെയ്യരുത്. എം ടി അഡ്വാൻസ് തുകയായ 1.25 കോടി മടക്കി നൽകും. ഇതോടെ ജില്ലാ കോടതിയിലും സുപ്രീം കോടതിയിലുമുളള കേസുകൾ ഇരു കൂട്ടരും പിൻവലിക്കും.ഇവയാണ് ഒത്തുതീർപ്പുവ്യവസ്ഥകൾ.
സുപ്രീം കോടതി തിങ്കളാഴ്ച കേസ് പരിഗണിക്കാനിരിക്കെയാണ് ഒത്തു തീ‍‌ർപ്പുണ്ടായത്. ഇക്കാര്യം ഇരു കൂട്ടരും സുപ്രീം കോടതിയെ അറിയിക്കും. ജസ്റ്റിസ് ചന്ദ്രചൂഡ് അദ്ധ്യക്ഷനായ ബെഞ്ചാണ് കേസ് പരിഗണിക്കാനിരുന്നത്.
.
