ചങ്ങനാശേരിയിൽ സിൽവർ ലൈൻ പദ്ധതിയുടെ സർവേ കല്ലുകൾ സ്ഥാപിക്കുന്നതിനെതിരെ പ്രതിഷേധം ശക്തം. കല്ലിടലിനെതിരെ ആത്മഹത്യാഭീഷണി മുഴക്കിയും മറ്റുമാണ് സ്ത്രീകളും കുട്ടികളും അടക്കമുള്ളവര് പ്രതിഷേധിച്ചത്. പ്രതിഷേധത്തിൽ മണ്ണെണ്ണയൊഴിച്ച് ആത്മഹത്യാശ്രമം നടത്തി സമരക്കാർ. പൊലീസ് ഇടപെട്ടാണ് ആത്മഹത്യാശ്രമം തടഞ്ഞത്. മണ്ണെണ്ണ ഒഴിച്ച് ആത്മഹത്യ ചെയ്യുമെന്ന് അറിയിച്ച ശേഷം മണ്ണെണ്ണ കുപ്പികളുമായെത്തിയ പ്രവർത്തകരെ പൊലീസ് ഇടപെട്ട് പിന്തിരിപ്പിക്കുകയായിരുന്നു.കല്ലിടല് തടസ്സപ്പെടുത്താന് ശ്രമിച്ച വനിതകളെ പൊലീസ് അറസ്റ്റ് ചെയ്ത് നീക്കിയ രീതി സംഘര്ഷത്തിനിടയാക്കി. സ്ത്രീകളെ വലിച്ചിഴച്ചാണ് സംഭവസ്ഥലത്ത് നിന്ന് പൊലീസ് മാറ്റിയത്. ഇത് കണ്ട് കുട്ടികള് കരഞ്ഞതോടെ, നാട്ടുകാര് പൊലീസിനെതിരെ തിരിഞ്ഞത് സംഘര്ഷാവസ്ഥയ്ക്ക് ഇടയാക്കി. പൊലീസുമായി രൂക്ഷമായ വാക്കേറ്റമാണ് നടന്നത്.തൃക്കൊടിത്താനം പോലീസ് സ്റ്റേഷന് മുൻപിലും പ്രതിഷേധം നടക്കുകയാണ്. കല്ലിടാന് ഉദ്യോഗസ്ഥര് എത്തിയപ്പോള് മനുഷ്യശൃംഖല തീര്ത്തായിരുന്നു നാട്ടുകാരുടെ പ്രതിഷേധം. അറസ്റ്റിനിടെ കേരള കോണ്ഗ്രസ് നേതാവ് വി ജെ ലാലിക്ക് ദേഹാസ്വാസ്ഥ്യം അനുഭവപ്പെട്ടു. കേരള കോണ്ഗ്രസ് നേതാവ് ജോസഫ് എം പുതുശ്ശേരി അടക്കമുള്ളവരെയാണ് പൊലീസ് അറസ്റ്റ് ചെയ്തുനീക്കിയത്. ചങ്ങനാശേരിയിലെ 16 കുടുംബങ്ങളാണ് വീട് നഷ്ടമാവുമെന്ന് പറഞ്ഞ് സമരം സംഘടിപ്പിച്ചത്. കല്ലിടാനുള്ള സംഘമെത്തിയാൽ അവരെ തടയുമെന്നുള്ള കാര്യം നേരത്തേ തന്നെ സമരക്കാർ വ്യക്തമാക്കിയിരുന്നു.അതേസമയം ചങ്ങനാശേരിയിൽ നാളെ സംയുക്ത സമരസമിതി ഹർത്താൽ പ്രഖ്യാപിച്ചിട്ടുണ്ട് നാളെ രാവിലെ ആറ് മണി മുതൽ വൈകീട്ട് ആറ് വരെയാണ് ഹർത്താൽ.യുഡിഎഫും കോൺഗ്രസും പിന്തുണ നൽകിയിട്ടുണ്ട്.
സിൽവർ ലൈനിനെതിരെ പ്രതിഷേധം;യുവതിയെ റോഡിലൂടെ വലിച്ചിഴച്ച് പൊലീസ്,ചങ്ങനാശേരിയിൽ നാളെ ഹർത്താൽ
