കോഴിക്കോട്: പന്തീരാങ്കാവില് നവവധുവിന് മര്ദനമേറ്റ കേസില് രാജ്ഭവനോട് റിപ്പോര്ട്ട് തേടിയെന്ന് ഗവര്ണര് ആരിഫ് മുഹമ്മദ് ഖാന്. റിപ്പോര്ട്ട് ലഭിച്ച ശേഷം പെണ്കുട്ടിയെ കാണാന് പോകുന്നതില് തീരുമാനമെടുക്കുമെന്ന് ഗവര്ണര് പറഞ്ഞു. വിഷയം സംസാരിക്കേണ്ടിവരുന്നത് അസ്വസ്ഥതയുണ്ടാക്കുന്നുവെന്നും സമൂഹത്തിന് നാണക്കേടുണ്ടാക്കുന്ന സംഭവമെന്നും ഗവര്ണര് പറഞ്ഞു.
പറവൂര് സ്വദേശിനിയായ നവവധുവാണ് കോഴിക്കോട് പന്തീരാങ്കാവിലെ ഭര്തൃവീട്ടില് ക്രൂരമായ ഗാര്ഹിക പീഡനത്തിന് ഇരയായത്. എറണാകുളത്ത് നിന്ന് വിവാഹ സല്ക്കാരചടങ്ങിന് എത്തിയ ബന്ധുക്കളാണ് യുവതിയുടെ ശരീരത്തിലെ പരിക്കുകള് കണ്ടത്. വീട്ടുകാര് യുവതിയുടെ മുഖത്തും കഴുത്തിലും മര്ദനമേറ്റതിന്റെ പാടുകള് കണ്ട് കാര്യം തിരക്കിയപ്പോഴാണ് മര്ദന വിവരം പുറത്തറിഞ്ഞത്. മെയ് 5-ന് എറണാകുളത്ത് വെച്ചായിരുന്നു ഇവരുടെ വിവാഹം.
