മധ്യപ്രദേശിലെ സീധി ജില്ലയില് ബസ് കനാലിലേക്ക് മറിഞ്ഞ് 37 പേര് മരിച്ചു. സീധിയില് നിന്നും സത്നയിലേക്ക് 54 യാത്രക്കാരുമായി പോവുകയായിരുന്ന ബസ് രാംപുരില് വെച്ച് നിയന്ത്രണം വിട്ട് കനാലിലേക്ക് പതിക്കുകയായിരുന്നു. രാവിലെ ഏഴരയോടെയായിരുന്നു അപകടം.
നിലവില് 37 മൃതദേഹങ്ങള് കണ്ടെടുത്തതായി പോലീസ് കമ്മീഷണര് രാജേഷ് ജെയിന് വാര്ത്താ ഏജന്സിയോട് പറഞ്ഞു. മരിച്ചവരില് 16 സ്ത്രീകളും 20 പുരുഷന്മാരും ഒരു കുട്ടിയും ഉള്പ്പെടുന്നു. ഏഴുപേര് കനാല് തീരത്തേക്ക് നീന്തിക്കയറിയതായും റിപ്പോര്ട്ട് ഉണ്ട്. ബാക്കിയുള്ളവര്ക്കായി തിരച്ചില് തുടരുകയാണ്.
ബസ് പൂര്ണമായും കനാലില് മുങ്ങിയതായി ദൃക്സാക്ഷികള് പറയുന്നു. സംസ്ഥാന ദുരന്ത പ്രതികരണ സേനയും നീന്തല് വിദഗ്ധരും സംഭവസ്ഥലത്തെത്തി രക്ഷാപ്രവര്ത്തനം ആരംഭിച്ചു. കനാലില് ജലനിരപ്പ് ഉയര്ന്നിരിക്കുന്നതിനാല് രക്ഷാപ്രവര്ത്തനത്തിന് തടസ്സം നേരിടുന്നുണ്ട്. ട്രാഫിക് തടസം ഒഴിവാക്കാന് കുറുക്കു വഴിക്ക് പോയ ബസാണ് അപകടത്തില്പ്പെട്ടത്.
ഇതേതുടര്ന്ന് ബാണ്സാഗര് അണക്കെട്ടില് നിന്ന് വെളളം തുറന്നുവിടരുതെന്ന് മുഖ്യമന്ത്രി അധികൃതര്ക്ക് നിര്ദേശം നല്കിയിട്ടുണ്ട്. ബന്സാഗര് കനാലിലെ ജലനിരപ്പ് കുറയ്ക്കുന്നതിനായി സിഹാവല് കനാലിലെ വെളളം തുറന്നുവിട്ടിരിക്കുകയാണ്. രക്ഷാപ്രവര്ത്തനം ഊര്ജിതപ്പെടുത്താന് മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന് ജില്ലാ കളക്ടര്ക്ക് നിര്ദേശം നല്കിയിട്ടുണ്ട്.
മരിച്ചവരുടെ കുടുംബങ്ങള്ക്ക് രണ്ടു ലക്ഷം രൂപയും ഗുരുതരമായി പരിക്കേറ്റവര്ക്ക് അമ്പതിനായിരം രൂപയും വീതം നല്കാന് പ്രധാനമന്ത്രി നിര്ദേശിച്ചു.
