ലൈസന്സ് താത്കാലികമായി റദ്ദാക്കാവുന്ന കുറ്റം ചെയ്തയാള്ക്ക് റദ്ദാക്കിയ ഉത്തരവ് ലഭിക്കാന് താമസമെടുക്കുന്നുവെന്ന കണ്ടെത്തലിനെത്തുടര്ന്ന് റോഡില് നിയമലംഘനം നടത്തിയാല് ലൈസന്സ് സ്പോട്ടിൽ സസ്പെന്ഡ് ചെയ്യുന്ന നടപടികള് പൂര്ത്തിയാകാന് കാലതാമസമുണ്ടാകില്ല . നിയമലംഘനം നടത്തിയയാളുടെ വാദംകേട്ട അന്നുതന്നെ ലൈസന്സ് റദ്ദാക്കി ഉത്തരവിറക്കാന് ആര്.ടി.ഒ.മാര്ക്കും ജോയന്റ് ആര്.ടി.ഒ.മാര്ക്കും മോട്ടോര്വാഹന വകുപ്പിന്റെ നിര്ദേശം.
.
പരിശോധിക്കുന്ന ഉദ്യോഗസ്ഥന് ലൈസന്സ് റദ്ദാക്കാന് ശുപാര്ശചെയ്താല് അന്തിമ നടപടിയെടുക്കുന്നത് ആര്.ടി.ഒ.യോ ജോയന്റ് ആര്.ടി.ഒ.യോ ആണ്. ഇവര് നടപടിക്ക് ശുപാര്ശ ചെയ്യപ്പെട്ടയാളുടെ വാദം കേള്ക്കും. വാദം തൃപ്തികരമല്ലെങ്കിലാണ് ലൈസന്സ് റദ്ദാക്കാന് ഉത്തരവിറക്കുക. ഈ നടപടിയാണ് വാദംകേട്ട അന്നുതന്നെ നടപ്പാക്കുന്നത്.
ഒരുമാസംമുതല് ആജീവനാന്തം ലൈസന്സ് റദ്ദാക്കാന് വരെ മോട്ടോര് വാഹനവകുപ്പ് നിയമപ്രകാരം കഴിയും. പലയിടങ്ങളിലും ലൈസന്സ് റദ്ദാക്കിയുള്ള ഉത്തരവ് ലഭിച്ചപ്പോഴേക്കും ശിക്ഷയുടെ കാലയളവ് പൂര്ത്തിയായ സംഭവങ്ങളുണ്ടായിരുന്നു.
മരണത്തിനോ ഗുരുതര പരിക്കിനോ കാരണമായ അപകടങ്ങള് ഉണ്ടാക്കല്, മദ്യപിച്ച് വാഹനമോടിക്കല്, വാഹനമോടിക്കുന്നതിനിടെ മൊബൈല് ഫോണ് ഉപയോഗിക്കല്, വാഹനമോടിക്കുന്നതിനിടെ മറ്റെന്തെങ്കിലും പ്രവര്ത്തിയിലേര്പ്പെടല് തുടങ്ങി 25-തരം നിയമലംഘനങ്ങള്ക്കാണ് ലൈസന്സ് റദ്ദാക്കുക.
