ഖത്തറില് സ്കൂള് ബസിനുള്ളില് മലയാളി വിദ്യാര്ഥിനി മരിച്ച സംഭവത്തില് സ്വകാര്യ നഴ്സറി സ്കൂള് പൂട്ടാന് ഉത്തരവ്. നാലുവയസ്സുകാരിയായ മലയാളി പെണ്കുട്ടി പഠിച്ചിരുന്ന ദോഹ അല് വക്റയിലെ സ്പ്രിങ് ഫീല്ഡ് കിന്ഡര് ഗര്ട്ടന് അടച്ചുപൂട്ടാന് വിദ്യാഭ്യാസ മന്ത്രാലയം ഉത്തരവിട്ടു.സംഭവത്തില് സ്കൂള് ജീവനക്കാരുടെ ഭാഗത്ത് വലിയ വീഴ്ച സംഭവിച്ചുവെന്ന് കണ്ടെത്തിയതിനെ തുടര്ന്നാണ് നടപടി.ഞായറാഴ്ചയാണ് കുട്ടി മരിച്ചത്. കോട്ടയം ചിങ്ങവനം സ്വദേശി കൊച്ചുപറമ്പില് അഭിലാഷ് ചാക്കോ സൗമ്യ ചാക്കോ ദമ്പതികളുടെ ഇളയ മകളാണ് മിന്സ.രാവിലെ സ്കൂളിലേക്കുള്ള യാത്രാമധ്യേ ഉറങ്ങിപ്പോയെന്നും വിദ്യാർത്ഥി മറ്റുള്ളവരോടൊപ്പം ഇറങ്ങാതിരുന്നത് ബസ് ജീവനക്കാർ ശ്രദ്ധിച്ചില്ലെന്നും കുടുംബവുമായി അടുപ്പമുള്ള സുഹൃത്തുക്കൾ പറയുന്നു. അകത്ത് കുട്ടിയുടെ സാന്നിധ്യം ആരും അറിയാതെ പൂട്ടിയ ബസ് തുറസ്സായ സ്ഥലത്താണ് നിർത്തിയത്.രാവിലെ 11.30 ന് ഡ്യൂട്ടി പുനരാരംഭിക്കാന് ബസില് തിരിച്ചെത്തിയപ്പോഴാണ് ജീവനക്കാര് കുട്ടിയെ ബസ്സിനുള്ളില് അബോധാവസ്ഥയില് കണ്ടത്. പെട്ടെന്ന് തന്നെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.ബസിനുള്ളിലെ കനത്ത ചൂടും വായുസഞ്ചാരം കുറഞ്ഞതുമാണ് മരണത്തിനുള്ള കാരണമെന്നാണ് പ്രാഥമിക നിഗമനം.
കുട്ടിയുടെ മൃതദേഹം ഇന്ന് നെടുമ്പാശ്ശേരി വിമാനത്താവളത്തില് എത്തിക്കും. രണ്ട് ദിവസം നീണ്ട പരിശോധനകള്ക്ക് ശേഷം കഴിഞ്ഞ ദിവസമാണ് മൃതദേഹം ബന്ധുക്കള്ക്ക് വിട്ടുനല്കിയത്
