നിപാ ബാധയേറ്റ് ഒന്നര വര്ഷത്തോളമായി ചികിത്സയില് കഴിയുന്ന ആരോഗ്യപ്രവര്ത്തകന് ടിറ്റോ തോമസിന് മുഖ്യമന്ത്രിയുടെ ദുരിതാശ്വാസ നിധിയില് നിന്നും 17 ലക്ഷം രൂപ ധനസഹായം നല്കാന് മന്ത്രിസഭാ യോഗത്തില് തീരുമാനമായി. 2023 മുതല് നിപ്പ എന്സെഫലൈറ്റിസ് രോഗബാധയേറ്റ് അബോധാവസ്ഥയില് കോഴിക്കോട് സ്വകാര്യ ആശുപത്രിയില് ചികിത്സയില് കഴിയുകയാണ് ആരോഗ്യപ്രവര്ത്തകന് ടിറ്റോ തോമസ്
സര്ക്കാര് അഭിഭാഷകരുടെ വേതനം വര്ദ്ധിപ്പിക്കാനും മന്ത്രിസഭാ യോഗത്തില് തീരുമാനമായി. ജില്ലാ ഗവണ്മെന്റ് പ്ലീഡര് & പബ്ലിക് പ്രോസിക്യൂട്ടര്, അഡീഷണല് ഗവണ്മെന്റ് പ്ലീഡര് & അഡീഷണല് പബ്ലിക് പ്രോസിക്യൂട്ടര്, പ്ലീഡര് ടു ഡു ഗവണ്മെന്റ്റ് വര്ക്ക് എന്നിവരുടെ പ്രതിമാസ വേതനമാണ് വര്ദ്ധിപ്പിക്കുക. യഥാക്രമം 87,500 രൂപയില് നിന്നും 1,10,000 രൂപയായും 75,000 രൂപയില് നിന്നും 95,000 രൂപയായും 20,000 രൂപയില് നിന്നും 25,000 രൂപയുമായാണ് വര്ദ്ധിപ്പിക്കുക.
തലശ്ശേരി വി ആര് കൃഷ്ണയ്യര് സ്മാരക സ്റ്റേഡിയം തലശ്ശേരി നഗരസഭയ്ക്ക് പാട്ടത്തിന് അനുവദിക്കുമെന്നും യോഗം തീരുമാനമെടുത്തു. സ്റ്റേഡിയം തലശ്ശേരി നഗരസഭയ്ക്ക് നിബന്ധനകളോടെ 10 വര്ഷത്തേക്ക് പാട്ടത്തിന് അനുവദിക്കാനാണ് തീരുമാനം. സര്ക്കാര് അനുമതിയോടു കൂടി മാത്രമെ വാണിജ്യ സ്ഥാപനങ്ങള് വരാന് പാടുള്ളു. ഭൂമി കായിക ക്ഷേമവുമായി ബന്ധപ്പെട്ട ആവശ്യത്തിന് മാത്രമെ ഉപയോഗിക്കാന് പാടുള്ളു. മുന്സിപ്പാലിറ്റി ചെയര്മാന് അധ്യക്ഷനായും കായിക വകുപ്പിന്റെയും റവന്യു വകുപ്പിന്റെയും പ്രതിനിധികളെ അംഗങ്ങളായും ഉള്പ്പെടുത്തി കോ-ഓര്ഡിനേഷന് കമ്മിറ്റി രൂപീകരിക്കണം. കായിക വകുപ്പിന്റെ ഔദ്യോഗിക ആവശ്യങ്ങള്ക്ക് ഭൂമി സൗജന്യ നിരക്കില് ലഭ്യമാക്കണം. മറ്റ് വകുപ്പുകള്/ സംഘടനകള് കായിക ആവശ്യങ്ങള്ക്കായി സമീപിക്കുന്ന സാഹചര്യത്തില് ഉചിതമായ നിരക്കില് സ്റ്റേഡിയം വിട്ടുനല്കുന്നതിനുള്ള തീരുമാനം സ്റ്റേഡിയം മാനേജെന്റ്റ് കമ്മിറ്റി സംയുക്തമായി എടുക്കേണ്ടതാണ്.
