കണ്ണൂര്: ആറളം ഫാമില് വീണ്ടും കാട്ടാന ആക്രമണം. ബ്ലോക്ക് മൂന്നിലെ ചെത്തുതൊഴിലാളിക്ക് പരുക്ക്. അമ്പലക്കണ്ടി സ്വദേശി പി കെ പ്രസാദിനെയാണ് ആന ആക്രമിച്ചത്. ഇന്ന് പുലര്ച്ചെയായിരുന്നു സംഭവം. പ്രസാദിന്റെ വാരിയെല്ലുകള്ക്കാണ് പരുക്കേറ്റിരിക്കുന്നത്.
ആറളം ഫാമില് കാട്ടാന ആക്രമണം പതിവ് കാഴ്ചകളില് ഒന്നായി മാറുകയാണ്. കഴിഞ്ഞ ദിവസമായിരുന്നു കാട്ടാനയുടെ ആക്രമണത്തില് പതിമൂന്നാം ബ്ലോക്കിലെ ദമ്പതികള്ക്ക് പരുക്കേറ്റത്. ഇരുചക്ര വാഹനത്തില് പണിക്ക് പോകുന്നതിനിടെയായിരുന്നു ആനയുടെ മുന്നില്പ്പെട്ടത്. ഫെബ്രുവരി 23 ന് ആറളത്ത് കാട്ടാന ആക്രമണത്തില് ആദിവാസി ദമ്പതികള് കൊല്ലപ്പെട്ടിരുന്നു. ആറളം ഫാം ബ്ലോക്ക് 13 ലാണ് സംഭവം. വെള്ളി, ഭാര്യ ലീല എന്നിവരാണ് മരിച്ചത്. ഇരുവരും കശുവണ്ടി ശേഖരിക്കാന് പോയപ്പോഴാണ് കാട്ടാന ചവിട്ടിക്കൊന്നത്.
