തിരുവനന്തപുരം: കര്ഷക മരണങ്ങളുടെ ഉത്തരവാദിത്വം ഏറ്റെടുത്ത് വനം മന്ത്രി രാജിവെക്കണമെന്ന താമരശ്ശേരി ബിഷപ് മാര് റെമിജിയോസ് ഇഞ്ചനാനിയിലിന്റെ പ്രസ്താവനക്കെതിരെ വനംമന്ത്രി എ.കെ. ശശീന്ദ്രന്. ബിഷപ്പുമാര് ഏറ്റവും സൗമ്യമായ രീതിയില് സംസാരിക്കുന്നവരാണ് എന്നൊക്കെയാണ് താന് ധരിച്ചുവെച്ചതെന്നും ചിലസമയം അത് അങ്ങനെയാണോ എന്ന് സംശയമുണ്ടെന്നും വനംമന്ത്രി പറഞ്ഞു. ‘നല്ല വാക്ക് പറയുന്നതാണ് അവര്ക്ക് നല്ലത്. അവരെ പറ്റിയുള്ള ധാരണ തെറ്റിക്കരുത്. ഒരു മന്ത്രിയെ വിലയിരുത്താന് എല്ലാ പൗരന്മാര്ക്കും അവകാശമുണ്ട്. രാജിവെക്കണം എന്നു പറയുന്നത് ഒരു രാഷ്ട്രീയ ആവശ്യമാണ്. ബിഷപ്പുയര്ത്തിയത് അങ്ങനെയാണോ എന്ന് സംശയമുണ്ട്. രാജിവെച്ചാല് ഉയര്ന്നുവന്ന പ്രശ്നം തീരുമോ?’ -എ.കെ ശശീന്ദ്രന് ചോദിച്ചു.
‘രാജി പ്രശ്ന പരിഹാരമല്ല. എന്താണ് ഇതിനൊരു ശാശ്വത പരിഹാരം, അതാണ് വേണ്ടത്. വന്യജീവി ആക്രമണങ്ങള് എല്ലാം ജനവാസമേഖലയിലല്ല. വനത്തിനുള്ളിലും പുറത്തും നടക്കുന്നുണ്ട്. കഴിഞ്ഞ ദിവസം നടന്ന ആക്രമണങ്ങള് എവിടെയാണെന്ന് പരിശോധിക്കണം. താന് വിവാദപ്രസ്താവന നടത്തിയിട്ടില്ല. ആദിവാസികള് അല്ലാത്തവര് എന്തിനാണ് വനത്തിലെത്തുന്നതെന്നു പരിശോധിക്കണം. അതു നിയമവിരുദ്ധമാണ്’ -ശശീന്ദ്രന് പറഞ്ഞു.
കോട്ടയത്ത് ഇന്ഫാം അസംബ്ലിയില് പ്രസംഗിക്കവേയാണ് താമരശ്ശേരി രൂപത ബിഷപ്പ് മാര് റെമിജിയോസ് ഇഞ്ചനാനിയില് മന്ത്രിക്കെതിരെ രംഗത്തുവന്നത്. സംസ്ഥാനത്ത് തുടര്ച്ചായായി വന്യജീവി ആക്രമണത്തില് കര്ഷകര് മരിക്കുമ്പോള് സര്ക്കാരും വനപാലകരും നോക്കുകുത്തികളാവുന്നുവെന്നായിരുന്നു അദ്ദേഹത്തിന്റെ ആരോപണം. ‘ഇവിടെ ഒരു ഭരണം ഉണ്ടോയെന്ന് സംശയിക്കുന്നു. കര്ഷകന് ജീവിക്കാനുള്ള അവകാശങ്ങള് തമസ്ക്കരിക്കുന്നു. വനം വകുപ്പ് സ്വീകരിക്കുന്നത് കര്ഷകരെ ഉപദ്രവിക്കുന്ന സമീപനമാണ്. കര്ഷക മരണങ്ങളുടെ ഉത്തരവാദിത്വം ഏറ്റെടുത്ത് വനം മന്ത്രി രാജിവയ്ക്കണം’ -അദ്ദേഹം പറഞ്ഞു.
