എറണാകുളം: നടിയെ ആക്രമിച്ച കേസില് മുന് ഡിജിപി ആര്. ശ്രീലേഖയ്ക്കെതിരെ അതിജീവിത കോടതിയലക്ഷ്യ ഹരജി നല്കി. വിചാരണ കോടതിയിലാണ് ഹരജി നല്കിയത്. കേസില് പൊലീസ് വ്യാജതെളിവുകള് ഉണ്ടാക്കി എന്ന് ഓണ്ലൈന് ചാനലിന് നല്കിയ അഭിമുഖത്തില് ശ്രീലേഖ ആരോപിച്ചിരുന്നു.
കേസിലെ അന്തിമവാദം ഇന്ന് എറണാകുളം പ്രിന്സിപ്പല് സെഷന്സ് കോടതിയില് ആരംഭിക്കാനിരിക്കെയാണ് ഇത്തരമൊരു നടപടി. ദിലീപ് ഉള്പ്പെടെ ഒന്പത് പേരാണ് കേസില് പ്രതികള്. രണ്ടുപേരെ നേരത്തെ പ്രതിപ്പട്ടികയില് നിന്ന് ഒഴിവാക്കുകയും ഒരാളെ കേസില് മാപ്പു സാക്ഷിയാക്കുകയും ചെയ്തിരുന്നു.
കേസിലെ ഒന്നാം പ്രതി പള്സര് സുനിക്ക് ഏഴര വര്ഷത്തിന് ശേഷം സുപ്രിംകോടതി ജാമ്യം അനുവദിച്ചിരുന്നു. 2017 ഫെബ്രുവരിയിലാണ് കൊച്ചിയില് ഓടിക്കൊണ്ടിരുന്ന വാഹനത്തില് നടി അതിക്രൂരമായി ആക്രമിക്കപ്പെട്ടത്. 2018 മാര്ച്ചില് ആരംഭിച്ച കേസിന്റെ വിചാരണ നടപടികളാണ്, വര്ഷങ്ങള്ക്കുശേഷം അന്തിമഘട്ടത്തിലേക്ക് എത്തുന്നത്.
