ജമ്മു കാശ്മീരിലുണ്ടായ ചാവേറാക്രമണത്തില് മൂന്ന് സൈനികര്ക്ക് വീരമൃത്യു.കാശ്മീരിലെ രജൗരിയില് നിന്ന് 25 കിലോമീറ്റര് അകലെയുള്ള സൈനിക ക്യാമ്പിന് നേരെയാണ് ആക്രമണമുണ്ടായത്. രാവിലെയോടെയായിരുന്നു സംഭവം. ചാവേര് ആക്രമണം നടത്തിയ ഭീകരരെ സൈന്യം വധിച്ചു.
ദര്ഹാല് താലൂക്കിലെ പര്ഗാല് മേഖലയിലെ ക്യാമ്പിന് സമീപം ആയിരുന്നു സംഭവം. പ്രദേശത്ത് ഭീകരര് നുഴഞ്ഞു കയറാന് സാദ്ധ്യതയുണ്ടെന്ന മുന്നറിയിപ്പിന്റെ അടിസ്ഥാനത്തില് കഴിഞ്ഞ ഏതാനും ദിവസങ്ങളായി ഇവിടെ സുരക്ഷാ സേന വ്യാപക പരിശോധന നടത്തിവരികയാണ്. ഇന്ന് രാവിലെ പരിശോധനയ്ക്കിടെ രണ്ട് പേര് അതിര്ത്തി വഴി നുഴഞ്ഞ് കയറി ക്യാമ്പിന് സമീപത്തേക്ക് വരുന്നത് സുരക്ഷാ സേനയുടെ ശ്രദ്ധയില്പ്പെട്ടു. തുടര്ന്ന് ഇവരെ പിടികൂടാന് ശ്രമിക്കുകയായിരുന്നു.
ഇതിനിടെ സുരക്ഷാ സേനയ്ക്ക് നേരെ ഭീകരര് വെടിയുതിര്ത്തു. ഇതോടെ പ്രദേശത്ത് ഏറ്റുമുട്ടല് ആരംഭിക്കുകയായിരുന്നു. ആക്രമണത്തില് അഞ്ചോളം സൈനികര്ക്ക് പരിക്കേറ്റിട്ടുണ്ട്. ഇവര് അടുത്തുള്ള സൈനിക ആശുപത്രിയില് ചികിത്സയിലാണ്. സംഭവത്തിന്റെ പശ്ചാത്തലത്തില് പ്രദേശത്ത് അതീവ ജാഗ്രതാ നിര്ദ്ദേശം പുറപ്പെടുവിച്ചിട്ടുണ്ട്.
