വെസ്റ്റ് ബങ്കിലെ ജെനിന്‍ നഗരത്തില്‍ ഇസ്രയേല്‍ നടത്തിയ വെടിവെപ്പില്‍ അല്‍ജസീറ മാധ്യമപ്രവര്‍ത്തക കൊല്ലപ്പെട്ടു. ചാനലിലെ മുതിര്‍ന്ന മാധ്യമപ്രവര്‍ത്തക ഷിറിന്‍ അബൂ അഖ്ലയാണ് തലയ്ക്ക് വെടിയേറ്റ് ഗുരുതരമായ പരിക്കോടെ ആശുപത്രിയില്‍ പ്രവേശിപ്പിക്കപ്പെട്ട ശേഷം മരിച്ചത്. ഇവര്‍ക്ക് 51 വയസ്സായിരുന്നു. ബുധനാഴ്ച രാവിലെയാണ് സംഭവം നടന്നതെന്ന് പാലസ്തീന്‍ ആരോഗ്യ വകുപ്പ് അറിയിച്ചു. ജറുസലേമിലെ അല്‍ ഖുദ്‌സ് ദിനപത്രത്തിലെ മറ്റൊരു മാധ്യമപ്രവര്‍ത്തകന് വെടിവെപ്പില്‍ പരുക്കേറ്റിരുന്നു.
അതിനിടെ, ഫലസ്തീന്‍കാരും ഇസ്രായേല്‍ സൈന്യവും തമ്മില്‍ സംഘര്‍ഷം നടക്കുന്നതിനിടെയാണ് സംഭവമെന്നും ഇക്കാര്യം സംയുക്തമായി അന്വേഷിക്കുമെന്നും ഇസ്രായേല്‍ വിദേശകാര്യ മന്ത്രി അറിയിച്ചു. എന്നാല്‍, ഫലസ്തീന്‍ പോരാളികളാരും സ്ഥലത്തുണ്ടായിരുന്നില്ലെന്നും സംഘര്‍ഷത്തിലാണ് വെടിവെപ്പെന്ന ഇസ്രായേല്‍ വാദം കള്ളമാണെന്നും ഷിറിനൊപ്പം വെടിയേറ്റ സഹപ്രവര്‍ത്തകന്‍ അലി സമൗദി പറഞ്ഞു. ഇവര്‍ക്കൊപ്പമുണ്ടായിരുന്ന മറ്റ് രണ്ട് മാധ്യമപ്രവര്‍ത്തകരും ഇസ്രായേല്‍ വാദം നിഷേധിച്ചതായി അല്‍ ജസീറ ചാനല്‍ റിപ്പോര്‍ട്ട് ചെയ്തു.
അല്‍ ജസീറയുടെ ആദ്യകാല റിപ്പോര്‍ട്ടര്‍മാരില്‍ ഒരാളായിരുന്നു മരിച്ച ഷിറിന്‍. 1997 -ലാണ് അവര്‍ അല്‍ജസീറയില്‍ ജോലിയില്‍ പ്രവേശിച്ചത്. സംഭവത്തിനു തൊട്ടുമുമ്പ് ഷിറിന്‍ അല്‍ജസീറയുടെ റാമല്ലാ ബ്യൂറോയിലേക്ക് അയച്ച സന്ദേശത്തില്‍, ഇസ്രായേല്‍ സൈന്യം ജബ്രിയാതിലുള്ള ഒരു വീട് വളഞ്ഞതായും വീഡിയോയും വാര്‍ത്തയും ഉടന്‍ അയക്കാമെന്നും അറിയിച്ചിരുന്നതായി അല്‍ ജസീറാ റിപ്പോര്‍ട്ടില്‍ പറയുന്നു.
