തെക്ക് കിഴക്കൻ അറബിക്കടലിൽ 14ന് രാവിലെയോടെ ന്യൂനമര്ദം രൂപപ്പെടാൻ സാധ്യതയെന്ന് കേന്ദ്ര കാലാവസ്ഥ വകുപ്പ്. ലക്ഷദ്വീപിനു സമീപം വടക്ക് പടിഞ്ഞാറു ദിശയിൽ സഞ്ചരിക്കുന്ന ന്യൂനമര്ദം 16ഓടെ ഈ വർഷത്തെ ആദ്യത്തെ ചുഴലിക്കാറ്റായി മാറാനാണ് സാധ്യത. മ്യാന്മര് നൽകിയ ‘ടൗട്ടെ ‘ Taukte (Tau tae) എന്ന പേരായിരിക്കും ഉപയോഗിക്കുക. കേരളത്തിലും 14 മുതൽ ശക്തമായ മഴയ്ക്ക് സാധ്യതയുണ്ട്.
നിലവില് പ്രവചിക്കപ്പെട്ടിരിക്കുന്ന ന്യൂനമര്ദത്തിന്റെ സഞ്ചാരപഥത്തില് കേരളം ഇല്ലെങ്കിലും ന്യൂനമര്ദ രൂപീകരണ ഘട്ടത്തില് ശക്തമായ കടലാക്രമണവും തീരപ്രദേശങ്ങളില് ശക്തമായ കാറ്റും കേരളത്തില് വിവിധയിടങ്ങളില് ശക്തമായ മഴക്കും സാധ്യതയുണ്ട്. ഇവ മുന്നില് കണ്ടുകൊണ്ടുള്ള തയ്യാറെടുപ്പുകള് സര്ക്കാര് സംവിധാനങ്ങളും പൊതുജനങ്ങളും സ്വീകരിക്കണമെന്നും ദുരന്ത നിവാരണ അതോറിറ്റി നിര്ദേശിച്ചു.
ന്യൂനമര്ദ രൂപീകരണവുമായി ബന്ധപ്പെട്ട് കടലില് മോശമായ കാലാവസ്ഥക്കും ശക്തമായ കാറ്റിനും സാധ്യതയുള്ളതിനാല് കേരള തീരത്ത് നിന്നുള്ള മല്സ്യ ബന്ധനം 2021 മേയ് 14 മുതല് മറിച്ചൊരു അറിയിപ്പുണ്ടാകുന്ന വരെ പൂര്ണ്ണമായും നിരോധിച്ചതായി സംസ്ഥാന ദുരന്ത നിവാരണ അതോറിറ്റി അറിയിച്ചു.
നിലവില് ആഴക്കടലില് മല്സ്യ ബന്ധനത്തിലേര്പ്പെട്ടു കൊണ്ടിരിക്കുന്ന മല്സ്യത്തൊഴിലാളികള് മെയ് 14 ന് മുന്നോടിയായി അടുത്തുള്ള സുരക്ഷിത തീരത്തേക്ക് എത്തേണ്ടതാണ്. ആഴക്കടലില് മല്സ്യ ബന്ധനത്തിലേര്പ്പെട്ടു കൊണ്ടിരിക്കുന്ന മല്സ്യത്തൊഴിലാളികളിലേക്ക് ഈ വിവരം എത്തിക്കാന് വേണ്ട നടപടികള് ഉടനടി സ്വീകരിക്കണമെന്നും ദുരന്ത നിവാരണ അതോറിറ്റി നിര്ദേശിച്ചു.
വിവിധ ജില്ലകളിൽ ഓറഞ്ച് അലർട്ട്
മേയ് 14 : തിരുവനന്തപുരം, കൊല്ലം
മേയ് 15 : തിരുവനന്തപുരം, കൊല്ലം, പത്തനംതിട്ട, ആലപ്പുഴ
യെലോ അലർട്ട്
മേയ് 11 : ഇടുക്കി,മലപ്പുറം
മേയ് 12: ഇടുക്കി
മേയ് 13 : തിരുവനന്തപുരം
മേയ് 14 : പത്തനംതിട്ട, ആലപ്പുഴ, കോട്ടയം, എറണാകുളം
മേയ് 15 : കോട്ടയം, എറണാകുളം, ഇടുക്കി,തൃശൂർ
