ഗവര്ണറുടെ നിസഹകരണത്തെ തുടര്ന്ന് അസാധുവായ ഓര്ഡിനന്സുകള്ക്ക് പകരം ബില് പാസാക്കാന് സര്ക്കാര് നീക്കം. ഇതിനായി പ്രത്യേക നിയമസഭാ സമ്മേളനം വിളിക്കാന് ശിപാര്ശ. നിയമനിര്മ്മാണത്തിനായി 10 ദിവസത്തേക്ക് നിയമസഭ വിളിച്ചു ചേര്ക്കാനാണ് ശുപാര്ശ. ഇന്ന് ചേര്ന്ന് മന്ത്രിസഭാ യോഗത്തിലാണ് തീരുമാനം.
മന്ത്രിസഭാ യോഗത്തിന്റെ ശിപാര്ശ ഗവര്ണര് ആരിഫ് മുഹമ്മദ് ഖാന് കൈമാറും. ഈ മാസം 22 മുതല് സെപ്തംബര് 2 വരെ സഭ ചേരാനാണ് തീരുമാനിച്ചിരിക്കുന്നത്. ഗവര്ണര് ഓര്ഡിനന്സുകളില് ഒപ്പിടാത്തത് അസാധാരണ സാഹചര്യമാണെന്നും സഭ ചേരണമെന്നും മുഖ്യമന്ത്രി യോഗത്തില് പറഞ്ഞു.
പ്രധാനപ്പെട്ട നിയമങ്ങളെല്ലാം തന്നെ ബില്ലുകളായി അവതരിപ്പിച്ച് സഭയില് പാസാക്കി ഗവര്ണറുടെ അനുമതിക്കായി സമര്പ്പിക്കാനാണ് സര്ക്കാര് തീരുമാനിച്ചിരിക്കുന്നത്. ഗവര്ണര് ഒപ്പിടാതിരുന്നതിനെ തുടര്ന്ന് ലോകായുക്ത നിയമ ഭേദഗതി ഉള്പ്പെടെ 11 ഓര്ഡിനന്സുകളാണ് അസാധുവായത്. ഈ ഓര്ഡിനന്സുകള് രാജ്ഭവനിലേയ്ക്ക് ഗവര്ണര് തിരിച്ചയച്ചിട്ടില്ല. ഓര്ഡിനന്സുകള് തിരിച്ചയച്ചാല് മാത്രമാണ് അതില് ഭേദഗതി വരുത്തി വീണ്ടും ഗവര്ണറുടെ പരിഗണനയ്ക്ക് അയക്കാന് സര്ക്കാരിന് സാധിക്കൂ.
അതേസമയം, വിശദമായി പഠിച്ച ശേഷമേ ഓര്ഡിനന്സില് താന് ഒപ്പിടുവെന്ന് വീണ്ടും ആവര്ത്തിച്ച് ഗവര്ണര് ആരിഫ് മുഹമ്മദ് ഖാന്. ഞാന് എന്റെ ജോലിയാണ് ചെയ്യുന്നത്. എനിക്ക് ബോധമുള്ള കാര്യങ്ങളും തീരുമാനങ്ങളുമാണ് നടപ്പിലാക്കുന്നത്. വിശദമായി പഠിച്ച ശേഷമേ ഓര്ഡിനന്സില് താന് ഒപ്പിടുവെന്ന് വീണ്ടും ആവര്ത്തിച്ച് ഗവര്ണര്. സംസ്ഥാന സര്ക്കാര് സമര്പ്പിച്ച 11 ഓര്ഡിനന്സുകള് ഗവര്ണര് ഒപ്പിട്ടില്ലെന്ന ആരോപണത്തോട് ദല്ഹിയില് പ്രതികരിക്കുകയായിരുന്നു അദ്ദേഹം.
നിയമസഭ ചേരാത്ത സാഹചര്യത്തിലാണ് ഓര്ഡിനന്സ് ഇറക്കുന്നത്. കഴിഞ്ഞ തവണ നിയമസഭ ചേര്ന്നപ്പോള് എന്തുകൊണ്ടാണാണ് ഈ ഓര്ഡിനന്സുകളെല്ലാം സഭയില് വെയ്ക്കാതിരുന്നത്. ഓര്ഡിനന്സുകള് സംബന്ധിച്ച് വിശദമായി പഠിച്ചശേഷം ഒപ്പിടുന്ന കാര്യം തീരുമാനിക്കാം.
എല്ലാവര്ക്കും അവരവരുടേതായ അഭിപ്രായങ്ങളുണ്ട്. അതിന്റെകൂടെ പോകാന് താല്പ്പര്യമില്ല. നമ്മള് ഒരു ജനാധിപത്യ വ്യവസ്ഥിതിയിലാണ് ജീവിക്കുന്നത്. ഞാന് എന്റെ ജോലിചെയ്യുകയാണ്. ആരും എന്നെ നിയന്ത്രിക്കുന്നില്ല. ഞാന് എന്റെ തീരുമാനങ്ങളും ബോധമുള്ള കാര്യങ്ങളുമാണ് നടപ്പിലാക്കുന്നത്. അവര്ക്ക് എന്നെ വിമര്ശിക്കാം, നിരസിക്കാം. ചെയ്യാന് പറ്റുന്നതെന്തും ചെയ്യാമെന്നും ഗവര്ണര് പറഞ്ഞു.