സിനിമാ പ്രേമികൾ ഒരുപോലെ ഏറ്റെടുത്ത പ്രഖ്യാപനമായിരുന്നു മോഹൻലാൽ നായകനാകുന്ന പാൻ ഇന്ത്യൻ ചിത്രം ഋഷഭയുടേത്. ഹിന്ദി, മലയം, തമിഴ്. തെലുങ്ക് ഭാഷകളിലൊരുങ്ങുന്ന സിനിമയുടെ തിരക്കഥ പൂർത്തിയായതായും ചിത്രീകരണം ഉടനെ തുടങ്ങുമെന്നുമുള്ള വാർത്തകളാണ് ഇപ്പോൾ സാമൂഹിക മാധ്യമങ്ങളിലൂടെ പ്രചരിക്കുന്നത്.
കഴിഞ്ഞ വർഷം മോഹൻലാൽ പ്രഖ്യാപിച്ച ചിത്രത്തിന്റെ സംവിധാനം നന്ദകുമാറാണ്.എവിഎസ് സ്റ്റുഡിയോസിന്റെ ബാനറിൽ അഭിഷേക് വ്യാസ്, പ്രവർ സിംഗ്, ശ്യാം സുന്ദർ എന്നിവർ ചേർന്നാണ് ചിത്രം നിർമ്മിക്കുന്നത്. തലമുറകളുടെ കഥ പറയുന്ന ചിത്രത്തിൽ ഒരു പിതാവിന്റെ വേഷത്തിലാണ് മോഹൻലാൽ എത്തുക. അദ്ദേഹത്തിന്റെ മകനായി ഒരു പ്രമുഖ തെലുങ്ക് നടൻ എത്തുമെന്ന സൂചനകളും ഉണ്ട്.
നിലവിൽ ‘മലൈക്കോട്ടൈ വാലിബൻ’ എന്ന സിനിമയിലാണ് മോഹൻലാൽ അഭിനയിക്കുന്നത്. ലിജോ ജോസ് പെല്ലിശ്ശേരി സംവിധാനം ചെയ്യുന്ന സിനിമയുടെ ചിത്രീകരണം ഏപ്രിലോടെ അവസാനിക്കും. തുടർന്ന് ജീത്തു ജോസഫ് സംവിധാനം ചെയ്യുന്ന ‘റാം’ എന്ന സിനിമയുടെ അടുത്ത ഷെഡ്യൂളിൽ മോഹൻലാൽ ജോയിൻ ചെയ്യും. ലണ്ടൻ, പാരിസ് എന്നിവിടങ്ങളിലായിരിക്കും ചിത്രീകരണം നടക്കുക. ഒരുങ്ങുന്നത് നീണ്ട ഷെഡ്യൂൾ ആണെന്നും സൂചനകളുണ്ട്.
