ചെന്നൈ: തമിഴ്നാട്ടില് മുല്ലപ്പൂവിന്റെ വില കുതിച്ചുയരുന്നു. 4500 രൂപയാണ് ഇന്ന് ഒരു കിലോ മുല്ലപ്പൂവിന്റെ വില. സംസ്ഥാനത്ത് ഏറ്റവുമധികം കല്യാണങ്ങളും മറ്റു ചടങ്ങുകളും നടക്കുന്ന മാസമാണ് ഡിസംബര്. കല്യാണ സീസണ് ആയതോടെ പൂവിലയില് വര്ധനവുണ്ടായിരുന്നു. എന്നാല് ഫെയ്ന്ജല് ചുഴലിക്കാറ്റിനെ തുടര്ന്നുണ്ടായ കനത്ത മഴയില് കൃഷി നശിച്ചുപോയതോടെ വില കുതിച്ചുയര്ന്നു.
തമിഴ്നാടിന്റെ തെക്കന് ജില്ലകളിലാണ് മുല്ലപ്പൂ കൃഷി കൂടുതലായി നടക്കുന്നത്. ഇവിടങ്ങളില് മഴ വ്യാപക നാശം വിതച്ചിരുന്നു. ഏക്കറുകണക്കിന് മുല്ലപ്പൂ കൃഷിയാണ് നശിച്ചത്. ജനുവരി വരെ വില ഉയരുന്നത് തുടരുമെന്നാണ് വ്യാപാരികള് പറയുന്നത്.
കേരളത്തിലും മുല്ലപ്പൂവിന് വില വര്ധിച്ചിട്ടുണ്ട്. തിരുവനന്തപുരം ജില്ലയില് 2000 രൂപയാണ് ഒരു കിലോ മുല്ലപ്പൂവിന് വില. കേരളത്തില് സീസണില് ഈ വിലക്കയറ്റം സാധാരണമാണ്. കഴിഞ്ഞ ഓണത്തിന് ജില്ലയില് ഒരു കിലോ മുല്ലപ്പൂവിന് 5500 രൂപയ്ക്ക് മുകളില് എത്തിയിരുന്നു.
