ഹെല്ത്ത് ഇന്സ്പെക്ടര്മാരെ സ്പെഷ്യല് പോളിംഗ് ഓഫീസര്മാരായി ചുമതലപ്പെടുത്തി
തദ്ദേശ സ്ഥാപനത്തിലെ ജൂനിയര് ഇന്സ്പെക്ടര്മാര് ഉള്പ്പെടെയുള്ള ഹെല്ത്ത് ഇന്സ്പെക്ടര്മാരെ സ്പെഷ്യല് പോളിംഗ് ഓഫീസര്മാരായി ചുമതലപ്പെടുത്തി ജില്ലാ കലക്ടര് സാംബശിവ റാവു ഉത്തരവിറക്കി. കോവിഡ് പോസിറ്റീവ് അയവര്ക്കും ക്വാറന്റൈനില് കഴിയുന്നവര്ക്കും അപേക്ഷ ഫോമും പോസ്റ്റല് ബാലറ്റും നേരിട്ട് അയച്ചു കൊടുക്കുന്ന സാഹചര്യത്തില് സത്യപ്രസ്താവന സാക്ഷ്യപ്പെടുത്തുന്നതിനായാണ് നടപടി.
സ്പെഷ്യല് വോട്ടര് നേരിട്ട് അപേക്ഷിക്കുന്ന ഫോറം 19ഡി യില് സ്പെഷ്യല് പോളിംഗ് ഓഫീസര് സത്യപ്രസ്താവന സാക്ഷ്യപ്പെടുത്തി നല്കും.
പോളിംഗ് ബൂത്തുകളില് കോവിഡ് മാനദണ്ഡങ്ങള് കര്ശനമായി പാലിക്കണം
പോളിംഗ് ബൂത്തുകളില് കോവിഡ് മാനദണ്ഡങ്ങള് കര്ശനമായി പാലിക്കണമെന്ന് ജില്ലാ കലക്ടര് സാംബശിവ റാവു അറിയിച്ചു.ബൂത്തിന് പുറത്ത് വെള്ളം, സോപ്പ് എന്നിവയും ബൂത്തിനകത്ത് സാനിറ്റൈസറും നിര്ബന്ധമായും ഉപയോഗിക്കണം. ബൂത്തിലേക്ക് പ്രവേശിക്കുമ്പോഴും പുറത്തേക്ക് പോകുമ്പോഴും പോളിംഗ് അസിസ്റ്റന്റുമാരാണ് സാനിറ്റൈസര് വിതരണം ചെയ്യുക. പോളിംഗ് ഉദ്യോഗസ്ഥര് ഫെയ്സ് ഷീല്ഡ്, മാസ്ക്, സാനിറ്റൈസര്, കയ്യുറ എന്നിവ ധരിക്കും. ബൂത്തിന് മുന്പില് വോട്ടര്മാര്ക്ക് സാമൂഹ്യ അകലം പാലിച്ച് ക്യൂ നില്ക്കുന്നതിന് നിശ്ചിത അകലത്തില് പ്രത്യേകം മാര്ക്ക് ചെയ്തിട്ടുണ്ടാകും. സ്ത്രീകള്ക്കും പുരുഷന്മാര്ക്കും പ്രത്യേകം ക്യൂ ഉണ്ടാകും. ഭിന്നശേഷിക്കാര്, രോഗ ബാധിതര്, 70 വയസിന് മുകളിലുള്ള മുതിര്ന്ന പൗരന്മാര് എന്നിവര്ക്ക് ക്യൂ നില്ക്കാതെ വോട്ട് ചെയ്യാം
ബൂത്തിനകത്ത് ഓരേ സമയം മൂന്ന് വോട്ടര്മാര്ക്ക് മാത്രമാണ് പ്രവേശനം. ബൂത്തില് പ്രവേശിക്കുമ്പോള് തിരിച്ചറിയല് രേഖ കാണിച്ച് ബോധ്യപ്പെടുത്തണം. വോട്ടര്മാര് മാസ്ക് നിര്ബന്ധമായും ധരിച്ചിരിക്കണം. തിരിച്ചറിയല് വേളയില് മാത്രം ആവശ്യമെങ്കില് മാസ്ക് മാറ്റണം. രജിസ്റ്ററില് ഒപ്പും വിരലടയാളവും പതിക്കണം. വോട്ടര്മാരുടെ വിരലില് ശ്രദ്ധാപൂര്വ്വമായിരിക്കും മഷി പുരട്ടുക.ഒരു പോളിംഗ് സ്റ്റേഷനില് നാല് പോളിംഗ് ഉദ്യോഗസ്ഥരും ഒരു പോളിംഗ് അസിസ്റ്റന്റും ഒരു പോലീസ് ഉദ്യോഗസ്ഥനും ഉണ്ടാകും. സ്ഥാനാര്ത്ഥികളുടെ ബൂത്ത് ഏജന്റുമാര് പത്തില് കൂടാന് പാടില്ല. പോളിംഗ് ഏജന്റുമാരുടെ ഇരിപ്പിടങ്ങള് സാമൂഹ്യ അകലം പാലിച്ച് വേണം ക്രമീകരിക്കേണ്ടത്.
