കോഴിക്കോട്: മുഖ്യമന്ത്രിക്കെതിരെ ഇന്ന് നടത്തിയ പരാമര്ശത്തില് മാപ്പുപറഞ്ഞ് പി. വി അന്വര് എംഎല്എ. നാക്കുപിഴയാണുണ്ടായതെന്ന് അന്വര് ഫേസ്ബുക്കില് പങ്കുവെച്ച വീഡിയോയില് പറയുന്നു. ‘പിണറായി അല്ല പിണറായിയുടെ അപ്പന്റെ അപ്പന് പറഞ്ഞാലും ഞാന് മറുപടി കൊടുക്കും’ എന്ന് മാധ്യമങ്ങളോട് നടത്തിയ പരാമര്ശത്തിലാണ് അന്വറിന്റെ മാപ്പ് പറച്ചില്.
‘നിയമസഭ മന്ദിരത്തിന് മുന്നില്വെച്ച് നടത്തിയ പത്രസമ്മേളനത്തില് എനിക്ക് വലിയ നാക്കുപിഴ സംഭവിച്ചു. സഭ സമ്മേളനത്തില് പങ്കെടുത്ത് തിരിച്ചെത്തിയപ്പോള് എന്റെ ഓഫീസാണ് ഇക്കാര്യം ശ്രദ്ധയില്പ്പെടുത്തിയത്. ബഹുമാനപ്പെട്ട മുഖ്യമന്ത്രിയെക്കുറിച്ച് ‘പിണറായി അല്ല പിണറായിയുടെ അപ്പന്റെ അപ്പന് പറഞ്ഞാലും ഞാന് മറുപടി കൊടുക്കും’ എന്ന പരാമര്ശം ഉണ്ടായി. അപ്പന്റെ അപ്പന് എന്ന രീതിയില് അല്ല ഉദ്ദേശിച്ചത്. എന്നെ കള്ളനാക്കിക്കൊണ്ട് മുഖ്യമന്ത്രി നടത്തിയ പരാമര്ശത്തിനോട് എത്ര വലിയ ആളാണെങ്കിലും ഞാന് പ്രതികരിക്കും എന്നാണ് ഉദ്ദേശിച്ചത്. എന്റെ വാക്കുകള് അങ്ങനെ ആയിപ്പോയതില് ഖേദമുണ്ട്. മുഖ്യമന്ത്രിയോടും കുടുംബത്തോടും മാപ്പ് ചോദിക്കുന്നു’, പിവി അന്വര് വീഡിയോയില് പറഞ്ഞു.
