കരിപ്പൂർ വിമാനത്താവളം വഴി സ്വര്ണ്ണം കടത്താനുള്ള ശ്രമത്തിനിടെ യാത്രക്കാരൻ അറസ്റ്റിൽ. ജിദ്ദയില് നിന്നും കരിപ്പൂർ വിമാനത്താവളത്തിലെത്തിയ മലപ്പുറം മേല്മുറി സ്വദേശി മുഹമ്മദ് മുഹിയുദ്ദീന് (30) ആണ് പോലീസ് പിടിയിലായത്. ശരീരത്തിനകത്ത് 1.006 കിലോഗ്രാം സ്വര്ണ്ണം മിശ്രിത രൂപത്തിലാക്കി 4 കാപ്സ്യൂളുകളായി ഒളിപ്പിച്ച് കടത്താനാണ് ഇയാള് ശ്രമിച്ചത്. അഭ്യന്തര വിപണിയില് 52 ലക്ഷം രൂപ വില വരുന്ന സ്വർണമാണ് പിടിച്ചെടുത്തത്. കഴിഞ്ഞ ദിവസം രാത്രി 9.30 മണിക്ക് ജിദ്ദയില് നിന്നെത്തിയ എയര് ഇന്ത്യ എക്സ്പ്രസ്സ് വിമാനത്തിലാണ് (IX 398) കാലികറ്റ് എയര്പോര്ട്ടിലിറങ്ങിയത്.കസ്റ്റംസ് പരിശോധനയ്ക്ക് ശേഷം 10.20 മണിയോടെ വിമാനത്താവളത്തിന് പുറത്തിറങ്ങിയ മുഹിയുദ്ദീനെ നിരീക്ഷിച്ചുകൊണ്ട് പുറത്ത് പോലീസുണ്ടായിരുന്നു. കുറച്ച് സമയം എയര്പോര്ട്ട് പരിസരത്ത് തങ്ങിയ മുഹിയുദ്ദീന് തന്നെ കൊണ്ട് പോവാന് വന്ന സുഹൃത്തിനോടൊപ്പം കാറില് കയറി പുറത്തേക്ക് പോകും വഴി സീറോ പോയിന്റില് വെച്ചാണ് പോലീസ് കസ്റ്റഡിയിലെടുത്തത്. മലപ്പുറം ജില്ലാ പോലീസ് മേധാവി ശ്രീ.എസ്.സുജിത് ദാസ് ഐ പി എസിന് ന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് മുഹിയുദ്ദീനെ പോലീസ് കസ്റ്റഡിയിലെടുത്തത്. ആദ്യഘട്ട ചോദ്യം ചെയ്യലിൽ കുറ്റം സമ്മതിക്കാൻ മുഹിയുദ്ദീന് വിസമ്മതിച്ചിരുന്നു. തുടർന്ന് ഇയാളുടെ ദേഹവും ലഗേജും പോലീസ് വിശദമായി പരിശോധിച്ചു. എന്നാല് സ്വര്ണ്ണം കണ്ടെത്താനായില്ല. തൂടര്ന്ന് മുഹിയുദ്ദീനെ സ്വകാര്യ ആശുപത്രിയിലെത്തിച്ച് വിശദമായ വൈദ്യ പരിശോധന നടത്തുകയായിരുന്നു. എക്സറേ പരിശോധനയില് മുഹിയുദ്ദീന്െറ വയറിനകത്ത് സ്വര്ണ്ണ മിശ്രിതമടങ്ങിയ 4 കാപ്സ്യൂളുകള് കണ്ടെത്തുകയായിരുന്നു.സ്വര്ണ്ണം സ്വീകരിക്കാന് എയര്പോര്ട്ടില് ആളുകള് വരുമെന്നായിരുന്നു മുഹിയുദ്ദീനെ ജിദ്ദയില് നിന്നും സ്വര്ണ്ണം കൊടുത്തുവിട്ടവര് അറിയിച്ചിരുന്നത്.ഇയാളെ വിശദമായി ചോദ്യം ചെയ്ത് വരികയാണ്. സ്വര്ണ്ണകടത്തിന് പിന്നിലുള്ളലരെ കണ്ടെത്താനുള്ള ശ്രമം തുടരുകയാണ്.
പിടിച്ചെടുത്ത സ്വര്ണ്ണം കോടതിയില് സമര്പ്പിക്കും, അതൊടൊപ്പം തുടരന്വേഷണത്തിനായി വിശദമായ റിപ്പോര്ട് കസ്റ്റംസിനും സമര്പ്പിക്കും.കഴിഞ്ഞ ഏതാനും മാസങ്ങൾക്കിടെ കരിപ്പൂർ വിമാനത്താവളത്തിൽ പോലീസ് പിടികൂടുന്ന 74-ാമത്തെ സ്വർണക്കടത്ത് കേസാണിത്.
കരിപ്പൂർ വിമാനത്താവളം വഴി കടത്താന് ശ്രമിച്ച ഒരു കിലോയിലധികം സ്വർണം പോലീസ് പിടികൂടി
