കോഴിക്കോട്: കനോലി കനാലിന്റെ ശുചീകരണ പ്രവൃത്തി രണ്ട് മാസം പിന്നിടിന്നു. ഇതുവരെ ഏഴ് കിലോമീറ്റര്‍ ദൂരത്തിലെ കുളവാഴയും മാലിന്യങ്ങളും അഞ്ച് കിലോമീറ്ററിലെ ചെളിയുമാണ് നീക്കിയത്. ശേഷിക്കുന്ന ഭാഗങ്ങളില്‍ പ്രവൃത്തി പുരോഗമിക്കുകയാണ്. ഒന്നരമാസത്തിനുള്ളില്‍ തന്നെ ശുചീകരണ പ്രവൃത്തികള്‍ പൂര്‍ത്തീകരിച്ച് ബോട്ട് ഓടിക്കാനുള്ള നടപടികള്‍ക്ക് തുടക്കമാവും.
ജലപാതയ്ക്കായി ക്വില്‍ (കേരള വാട്ടര്‍വെയ്സ് ആന്‍ഡ് ഇന്‍ഫ്രാസ്ട്രക്ചേഴ്സ് ലിമിറ്റഡ്) ആണ് കനാല്‍ ശുചീകരിക്കുന്നത്. നിലവില്‍ എരഞ്ഞിപ്പാലും മുതല്‍ കാരപ്പറമ്പ് വരെയുള്ള ഭാഗത്താണ് ചെളി നീക്കല്‍ നടക്കുന്നത്. മഴപെയ്ത് വെള്ളം ഉയര്‍ന്നാല്‍ ചെളി നീക്കല്‍ പ്രവൃത്തിക്ക് വേഗം കൂടും. കല്ലായ് മുതല്‍ എരഞ്ഞിക്കല്‍ വരെയുള്ള 11.2 കിലോ മീറ്റര്‍ കനാലാണ് ജലപാതയ്ക്കായി ക്വില്ലിന്റെ കീഴില്‍ വൃത്തിയാക്കുന്നത്.
