ന്യൂഡല്ഹി: പ്രതിപക്ഷം ഭരിക്കുന്ന സംസ്ഥാനങ്ങളില് ഗവര്ണര്മാരെ ഉപയോഗിച്ച് വിരട്ടാനുള്ള കേന്ദ്ര സര്ക്കാറിന്റെ ശ്രമങ്ങള്ക്ക് തിരിച്ചടിയായി സുപ്രീംകോടതി ഇടപെടല്. നിയമസഭ പാസാക്കിയ ബില്ലുകള് പിടിച്ചുവക്കുകയും തിരിച്ചയക്കുകയും ചെയ്യുന്ന ഗവര്ണമാരുടെ നടപടിക്ക് സുപ്രീംകോടതി തടയിട്ടു. ബില്ലുകള് അനന്തമായി നീട്ടിക്കൊണ്ടുപോകരുതെന്നും പരമാവധി മൂന്ന് മാസത്തിനുള്ളില് തീരുമാനം എടുക്കണമെന്നും കോടതി ഉത്തരവിട്ടു. ഗവര്ണര് ആര്.എന്. രവിക്കെതിരായ തമിഴ്നാട് സര്ക്കാരിന്റെ ഹര്ജിയിലാണ് നിര്ണായക ഉത്തരവ്.
നിയമങ്ങള് ജനങ്ങളുടെ ആവശ്യത്തിനായി കൊണ്ടുവരുന്നതാണ്. ഗവര്ണര് അനുമതി നിഷേധിച്ച ബില്ലുകള് നിയമസഭ വീണ്ടും പാസാക്കി തിരിച്ചയച്ചാല് പരമാവധി ഒരു മാസത്തിനുള്ളില് തീരുമാനമെടുക്കണം. ഇക്കാലയളവില് ബില്ല് തടഞ്ഞുവെക്കാനോ രാഷ്ട്രപതിക്ക് അയക്കാനോ തീരുമാനിക്കണം.
സംസ്ഥാന സര്ക്കാരിന്റ് ഉപദേശത്തിന് അനുസരിച്ചാകണം ഗവര്ണര് പ്രവര്ത്തിക്കേണ്ടത്. അനുഛേദം 200 അനുസരിച്ച് ഗവര്ണറുടെ വിവേചനാധികാരം എന്ന ഒന്നില്ല. അനുഛേദം 200 പ്രകാരം നടപടികളില് ഒന്ന് സ്വീകരിച്ചേ മതിയാകൂ എന്നും സുപ്രീം കോടതി വ്യക്തമാക്കി.
