ഇന്ത്യന്‍ സൂപ്പര്‍ ലീഗ് ( Indian Super League ) 2023 – 2024 സീസണിനു മുന്നോടി ആയി വന്‍ പൊളിച്ചെഴുത്തുകള്‍ കേരള ബ്ലാസ്റ്റേഴ്സ് എഫ് സി ( Kerala Blasters F C ) നടത്തും എന്ന് ഏകദേശം വ്യക്തമായി. അടുത്ത സീസണിനു മുമ്പായി അഞ്ച് കളിക്കാര്‍ കേരള ബ്ലാസ്റ്റേഴ്സ് എഫ് സി വിടും എന്നും എകദേശം ഉറപ്പായി. ഏറ്റവും ഒടുവിലായി കേരള ബ്ലാസ്റ്റേഴ്സ് എഫ് സി യുടെ യുവ മിഡ്ഫീല്‍ഡര്‍ ക്ലബ് വിടും എന്ന റിപ്പോര്‍ട്ടാണ് പുറത്ത് വന്നിരിക്കുന്നത്.
കേരള ബ്ലാസ്റ്റേഴ്സ് എഫ് സി പ്രതിരോധ നിരക്കാരായ സ്പാനിഷ് താരം വിക്ടര്‍ മോംഗില്‍, ക്യാപ്റ്റന്‍ ജെസെല്‍ കര്‍ണെയ്‌റൊ, ഹര്‍മന്‍ജോത് സിംഗ് ഖബ്ര, നിഷു കുമാര്‍ എന്നിവരാണ് ക്ലബ് വിടും എന്ന് ഇതിനോടകം റിപ്പോര്‍ട്ട് വന്നത്. ഇവര്‍ക്ക് പിന്നാലെ സെന്‍ട്രല്‍ മിഡ്ഫീല്‍ഡര്‍ ആയുഷ് അധികാരി ( Ayush Adhikari ) യും കേരള ബ്ലാസ്റ്റേഴ്സ് എഫ് സി വിടും എന്നാണ് ഇപ്പോള്‍ ലഭിക്കുന്ന റിപ്പോര്‍ട്ട്.
2022 – 2023 സീസണിനു മുമ്പായി കേരള ബ്ലാസ്റ്റേഴ്സ് എഫ് സി വിടാന്‍ ശ്രമം നടത്തിയ കളിക്കാരനാണ് ഡല്‍ഹി സ്വദേശിയായ ആയുഷ് അധികാരി. കൂടുതല്‍ മത്സര സമയം ലഭിക്കാനാണ് 22 കാരനായ ആയുഷ് അധികാരം കേരള ബ്ലാസ്റ്റേഴ്സ് എഫ് സി വിടുന്നത്. 2019 ല്‍ കേരള ബ്ലാസ്റ്റേഴ്സ് എഫ് സി യുടെ ബി ടീമില്‍ ഉണ്ടായിരുന്ന താരമാണ് ആയുഷ് അധികാരി. 2019 – 2020 സീസണില്‍ ഐ ലീഗ് ക്ലബ്ബായ ഇന്ത്യന്‍ ആരോസിനായി ലോണ്‍ വ്യവസ്ഥയില്‍ കളിച്ചു. 2020 മുതല്‍ കേരള ബ്ലാസ്റ്റേഴ്സ് എഫ് സി സീനിയര്‍ ടീമില്‍ അംഗമാണ് അദ്ദേഹം.
2022 – 2023 സീസണില്‍ ഏഴ് മത്സരങ്ങളില്‍ മാത്രമാണ് ആയുഷ് അധികാരിക്ക് കേരള ബ്ലാസ്റ്റേഴ്സ് എഫ് സി ജഴ്‌സിയില്‍ കളിക്കാന്‍ സാധിച്ചത്. അതില്‍ ആറ് മത്സരങ്ങളിലും സബ്സ്റ്റിറ്റിയൂട്ട് ആയി ആയിരുന്നു കളത്തില്‍ എത്തിയത്. മൂന്ന് സീസണില്‍ ആയി 25 ഐ എസ് എല്‍ മത്സരങ്ങളില്‍ ആയുഷ് അധികാരി കേരള ബ്ലാസ്റ്റേഴ്സ് എഫ് സി ജഴ്‌സി അണിഞ്ഞു. കേരള ബ്ലാസ്റ്റേഴ്സ് എഫ് സി ബി ടീമിനായി ഒരു ഗോള്‍ നേടിയിട്ടുണ്ട്. ക്ലബ് തലത്തില്‍ ആകെ 55 മത്സരങ്ങളുടെ പരിചയം ആയുഷ് അധികാരിക്ക് ഉണ്ട്. ഒരു ഗോളും ഒരു അസിസ്റ്റും ക്ലബ് തലത്തില്‍ ഈ ഡല്‍ഹിക്കാരന്‍ സ്വന്തമാക്കി.
