ഡൽഹി അതിർത്തികളിൽ നടക്കുന്ന കർഷക സമരത്തിൽ കോവിഡ് ആശങ്ക അറിയിച്ച് സുപ്രിംകോടതി. സമരം നിസാമുദ്ദീനിൽ ഉണ്ടായ സ്ഥിതി ആവർത്തിക്കാൻ സാധ്യതയുണ്ടെന്ന് സുപ്രിംകോടതി നിരീക്ഷിച്ചു. സമരങ്ങളിൽ കൊവിഡ് മാനദണ്ഡം പാലിക്കുന്നുണ്ടോയെന്നും സമരം രോഗ വ്യാപനത്തിന് കാരണമാകുമോ എന്നും സുപ്രീംകോടതി ചോദിച്ചു.
കോവിഡ് മാനദണ്ഡങ്ങൾ പാലിച്ചല്ല കർഷക സമരമെന്ന് കേന്ദ്രസർക്കാർ മറുപടി നൽകി. ആൾക്കൂട്ടം ഒഴിവാക്കുന്നതിനായി സർക്കാർ സ്വീകരിച്ച നടപടികളിൽ കേന്ദ്ര സർക്കാരിനോട് സുപ്രിംകോടതി റിപ്പോർട്ട് തേടി. തബ്ലീഗ് സമ്മേളനത്തിന്‍റെ സമയത്തുണ്ടായ അതേ സാഹചര്യമാണ് കർഷക സമരത്തിലും നില നിൽക്കുന്നത്. കർഷകർക്ക് കോവിഡിൽ നിന്നും സംരക്ഷണമുണ്ടോയെന്ന് വ്യക്തമല്ല. അവരുടെ സംരക്ഷണത്തിനായി നിങ്ങൾ എന്തൊക്കെ നടപടികളാണ് സ്വീകരിച്ചതെന്ന് വ്യക്തമാക്കണമെന്ന് സോളിസിറ്റർ ജനറൽ തുഷാർ മേത്തയോട് കോടതി നിർദേശിച്ചു. മുൻ അനുഭവങ്ങളിൽ നിന്ന് പാഠങ്ങളൊന്നും പഠിച്ചില്ലേയെന്നും സുപ്രീംകോടതി ചോദിച്ചു.
