സി.പി.ഐ.എം കണ്ണൂര് മുന് ജില്ലാ സെക്രട്ടറി പി. ജയരാജന് വരാനിരിക്കുന്ന നിയമസഭാ തെരഞ്ഞെടുപ്പില് മത്സരിച്ചേക്കില്ലെന്ന വാര്ത്തകള്ക്ക് പിന്നാലെ കണ്ണൂരില് പ്രതിഷേധം. ജയരാജന് സീറ്റ് നിഷേധിച്ചതില് പ്രതിഷേധിച്ച് സ്പോര്ട്സ് കൗണ്സില് കണ്ണൂര് ജില്ലാ വൈസ് പ്രസിഡണ്ട് ധീരജ് കുമാര് രാജിവെച്ചു.
ജയരാജന് സീറ്റ് നിഷേധിച്ചത് നീതികേടാണെന്ന് ധീരജ് കുമാര് പ്രതികരിച്ചു.നേരത്തെ ജയരാജന് മത്സരിച്ചേക്കുമെന്ന വാര്ത്തകള് പുറത്തുവന്നിരുന്നു. അഴിക്കോട് സീറ്റ് ജയരാജന് നല്കുമെന്ന റിപ്പോര്ട്ടുകളുണ്ടായിരുന്നെങ്കിലും ജില്ലാ കമ്മിറ്റി കൊടുത്ത പട്ടികയില് ജയരാജന്റെ പേരില്ലെന്നാണ് സൂചന.
പി ജയരാജന് സീറ്റ് നിഷേധിച്ചതില് പി ജെ ആര്മി എന്ന ഫെയ്സ്ബുക്ക് പേജിലും രൂക്ഷമായ പ്രതികരണങ്ങളാണുള്ളത്. ” ഒരു തിരുവോണനാളില് അകത്തളത്തില് ഇരച്ചുകയറിയവര്, ഒരിലച്ചീന്തിനു മുന്നില് ഒരുപിടി ഓണസദ്യക്ക് പോലും ഇടകൊടുക്കാതെ അരിഞ്ഞു വീഴ്ത്തിയപ്പോള് അവിടെനിന്ന് ഫിനിക്സ് പക്ഷിയെപ്പോലെ ഉയിര്ത്തെഴുന്നേറ്റ് ഞങ്ങളെ പൊരുതാന് പഠിപ്പിച്ച ധീരസഖാവേ…
ഞങ്ങള് പിടിച്ചിരിക്കുന്ന ഈ ചെങ്കൊടിക്കുള്ളില് അങ്ങയുടെ രക്തവും അങ്ങയുടെ ഒരുകയ്യിന് ജീവനുമുണ്ട്..അതുകൊണ്ട് തന്നെ ഞങ്ങളുടെ കണ്ണും കരളും ജീവനും താങ്കളോട് ഐക്യപെടുന്നു” എന്ന് കുറിച്ചിട്ടുണ്ട്.
