കിണറിൽ വീണ മൂർഖൻ പാമ്പിനെ രക്ഷിക്കാനുള്ള യുവാവിൻറെ സാഹസ ശ്രമം സമൂഹമാധ്യമങ്ങളിൽ വൈറലാവുന്നു. അരയില് കെട്ടിയ വയറിൽ തൂങ്ങി നിന്ന് ആഞ്ഞ് കൊത്താൻ ശ്രമിക്കുന്ന പാമ്പിനെ അതി സാഹസികമായാണ് യുവാവ് ചാക്കിലാക്കുന്നത്. പാമ്പ് പിടുത്തത്തിൽ പരിശീലനം ലഭിച്ച ആളെന്ന് തോന്നിപ്പിക്കുന്നതാണ് വീഡിയോയിലെ യുവാവിനൊപ്പമുള്ള ഉപകരണങ്ങൾ.
ചെറിയ ഹുക്കുള്ള കമ്പിയിൽ വെള്ളത്തിൽ കിടന്ന പാമ്പിനെ യുവാവ് ഉയർത്തുന്നു. പിന്നാലെ മൂർഖൻറെ വാലിൽ പിടിച്ച് സമീപത്തെ കയറിലുള്ള ബാഗിൽ കയറ്റാനായി ശ്രമിക്കുന്നു. എന്നാൽ പാമ്പ് ശര വേഗത്തിൽ യുവാവിനെ കൊത്താനായി ആയുന്നു. നിരവധി തവണയാണ് ബാഗിനും വാലിൽ പിടിച്ചിരിക്കുന്ന യുവാവിൻറെ കയ്യിലേക്കും ആഞ്ഞ് കൊത്താനായി മൂർഖൻ ആയുന്നത്. ഒരു ഘട്ടത്തിൽ മൂർഖൻ ബാഗിൻറെ പുറത്ത് കടിച്ച് പിടിച്ച് കിടക്കുന്നുമുണ്ട്. ആദ്യ ശ്രമങ്ങൾ പാളിയെങ്കിലും കുറച്ച് നേരത്തെ ശ്രമത്തിന് ശേഷം മൂർഖനെ സഞ്ചിയിലാക്കാൻ യുവാവിന് സാധിക്കുന്നു.
ഈ നേരമത്രയും പാമ്പിന കിണറിൽ നിന്ന് ഉയർത്താനായി ഉപയോഗിച്ച ഉപകരണം യുവാവ് കടിച്ച് പിടിച്ചാണ് ഇരിക്കുന്നത്. കിണറിൻറെ പടിയിൽ ചവിട്ടിയാണ് അരയിൽ ഒരു കയറ് കൊണ്ട് മാത്രം കെട്ടിയ നിലയിലുള്ള യുവാവ് ബാലൻസ് ചെയ്യുന്നത്. ഇൻസ്റ്റഗ്രാമിലാണ് വീഡിയോ വൈറലായിരിക്കുന്നത്. യുവാവിൻറെ സാഹസിക മനസിനെ നിരവധി പേരാണ് അഭിനന്ദിക്കുന്നത്. എത്ര പണം നൽകിയാലും ഇത്തരമൊരു സാഹസത്തിന് മുതിരില്ലെന്നാണ് പലരും വീഡിയോയോട് പ്രതികരിക്കുന്നത്.
