അധികാരത്തിലെത്തിയാല് നടപ്പാക്കുന്ന ശബരിമല നിയമത്തിന്റെ കരട് പുറത്തുവിട്ട് യുഡിഎഫ്. യുഡിഎഫ് സര്ക്കാര് അധികാരത്തില് വന്നാല് ശബരിമലയില് വിശ്വാസ സംരക്ഷണത്തിനായി പുതിയ നിയമ നിര്മാണം നടത്തുമെന്ന് തിരുവഞ്ചൂര് രാധാകൃഷ്ണന് എംഎല്എ പറഞ്ഞു. ശബരിമല വിഷയത്തില് കോടതി ഉത്തരവിന് ശേഷം എന്ത് നടപടിയാണ് സര്ക്കാര് സീകരിച്ചതെന്നും കോട്ടയത്ത് വാര്ത്ത സമ്മേളനത്തില് തിരുവഞ്ചൂര് ചോദിച്ചു.
ശബരിമല ആചാരസംരക്ഷണത്തിന് യുഡിഎഫ് അധികാരത്തിലെത്തിയാല് അവതരിപ്പിക്കുന്ന നിയമത്തിന്റെ കരടും തിരുവഞ്ചൂര് പുറത്തുവിട്ടു. ശബരിമലയില് ആചാരം ലംഘിച്ച് കടന്നാല് രണ്ടു വര്ഷം വരെ തടവുശിക്ഷ ലഭിക്കും. തന്ത്രിയാണ് ക്ഷേത്രത്തിന്റെ പരമാധികാരി. അവസാന വാക്ക് തന്ത്രിയുടേതാണ്. തന്ത്രിയുടെ അനുമതിയോടെ പ്രവേശന നിയന്ത്രണം നടപ്പാക്കുമെന്നും യുഡിഎഫിന്റെ കരട് നിയമത്തില് പറയുന്നു. കരട് നിയമം നിയമമന്ത്രി എ കെ ബാലന് നല്കാമെന്നും തിരുവഞ്ചൂര് രാധാകൃഷ്ണന് വ്യക്തമാക്കി.
സുപ്രിംകോടതി വിധിവന്നശേഷം തീരുമാനമെന്നത് ആരോടാണ് പറയുന്നത്. ഈ പ്രശ്നം പരിഹരിക്കാതെ എത്രകാലം മുന്നോട്ട് പോകാനാകും. ജനങ്ങളെ മുള്മുനയില് നിര്ത്തി മുന്നോട്ട്പോകാനുള്ള സിപിഐഎം തന്ത്രം ഒരിക്കലും അംഗീകരിക്കില്ല. പുതിയ നിയമ നിര്മാണത്തിലേക്ക് സര്ക്കാര് പോകണം. അവര് അത് ചെയ്യില്ലെങ്കില് യുഡിഎഫ് അത് ചെയ്യുമെന്നും തിരുവഞ്ചൂര് രാധാകൃഷ്ണന് പറഞ്ഞു.
