ന്യൂഡല്ഹി: പുതിയ കെപിസിസി അധ്യക്ഷനെ പ്രഖ്യാപിക്കാന് തിരക്കിട്ട നീക്കവുമായി എഐസിസി. പുതിയ കെപിസിസി അധ്യക്ഷനെ ഇന്ന് തന്നെ പ്രഖ്യാപിച്ചേക്കും. ദില്ലിയില് തിരക്കിട്ട നീക്കങ്ങള് നടക്കുകയാണെന്നാണ് സൂചന. ഐസിസി ജനറല് സെക്രട്ടറി കെ സി വേണുഗോപാല് രാഹുല് ഗാന്ധിയെ കണ്ടു. കേരള നേതാക്കളുമായി രാഹുല് ഗാന്ധി ഫോണില് സംസാരിച്ചു. നിലവിലെ സ്ഥിതിയും അധ്യക്ഷന്റെ മാറ്റത്തിലെ നിലപാടും നേതാക്കളോട് രാഹുല് ആരാഞ്ഞു. പ്രഖ്യാപനം ഇന്ന് തന്നെ വന്നേക്കും എന്നാണ് വിവരം. ആന്റോ ആന്റണിക്ക് തന്നെയാണ് മുന്തൂക്കം.
സുധാകരന്റെ പരസ്യ പ്രതികരണത്തില് എഐസിസി നേതൃത്വം കടുത്ത അതൃപ്തിയിലാണ്. കെ സുധാകരന്റെ വെല്ലുവിളി പാടേ അവഗണിക്കാനാണ് എഐസിസി നീക്കം. അധ്യക്ഷ സ്ഥാനത്ത് നിന്ന് മാറ്റുമെന്ന വ്യക്തമായ സൂചന ദില്ലി ചര്ച്ചയില് രാഹുല് ഗാന്ധിയും മല്ലികാര്ജ്ജുന് ഖര്ഗെയും നല്കിയിട്ടും, കെ സുധാകരന് മലക്കം മറിഞ്ഞെന്നാണ് നേതൃത്വം പറയുന്നത്. ഹൈക്കമാന്ഡ് വിശ്വാസത്തിലെടുത്ത് നടത്തിയ ചര്ച്ചയെ അവഗണിച്ച് പരസ്യ പ്രതികരണം നടത്തിയത് കടുത്ത അച്ചടക്ക ലംഘനമായാണ് നേതൃത്വം കാണുന്നത്.
