കേരളത്തിൽ ഓണ്‍ലൈന്‍ തട്ടിപ്പ് വ്യാപകമാകുന്നു. സംസ്ഥാന പൊലീസ് മേധാവി അനില്‍കാന്തിന്റെ പേരില്‍ വ്യാജ വാട്‌സ്ആപ്പ് അക്കൗണ്ട് ഉണ്ടാക്കി വിശ്വാസം നേടി നടത്തിയ ഓണ്‍ലൈന്‍ തട്ടിപ്പിൽ കൊല്ലത്തെ അധ്യാപികക്ക് നഷ്ടമായത് 14 ലക്ഷം രൂപ. ഓണ്‍ ലൈന്‍ ലോട്ടറിയടിച്ചെന്ന് പറഞ്ഞാണ് അനില്‍ കാന്തിന്റെ പേരില്‍ വ്യാജ വാട്‌സ് ആപ്പ് അക്കൗണ്ടുള്‍പ്പെടെ കാണിച്ച് വിശ്വസിപ്പിച്ച് പണം തട്ടിയത്. ഘട്ടംഘട്ടമായിട്ടായിരുന്നു അധ്യാപികയെ വിശ്വസിപ്പിച്ചതും പണം തട്ടിയതും.
തട്ടിപ്പിന്റെ തുടക്കം പതിവ് രീതിയിലൂടെ തന്നെയായിരുന്നു. കുണ്ടറ സ്വദേശിയായ അധ്യാപികയ്ക്ക് ആദ്യം ലഭിച്ചത് വന്‍ തുക ഓണ്‍ലൈന്‍ ലോട്ടറി അടിച്ചുവെന്നുള്ള സന്ദേശമായിരുന്നു. സംശയം തോന്നിയ അധ്യാപിക പക്ഷേ തിരിച്ച് സന്ദേശം അയച്ചു.സന്ദേശത്തിന് മറുപടിയായി അധ്യാപികയ്ക്ക് ലഭിച്ചത് ഡിജിപി അനില്‍കാന്തിന്റെ പേരിലുള്ള സന്ദേശം. സമ്മാന തുകയ്ക്ക് ടാക്‌സ് അടയ്ക്കണമെന്നും അല്ലെങ്കില്‍ നിയമ നടപടി നേരിടുമെന്നുമായിരുന്നു അറിയിപ്പ്. സന്ദേശം അയച്ച വാട്‌സ് ആപ് നമ്പറിന് ഡിജിപിയുടെ പ്രൊഫൈല്‍ ചിത്രം. താന്‍ ഇപ്പോള്‍ ഡല്‍ഹിയില്‍ ആണെന്നും ഡിജിപിയുടെന്ന പേരിലുള്ള സന്ദേശത്തില്‍ വ്യക്തമാക്കുന്നു.
സംശയം തീര്‍ക്കാന്‍ വീട്ടമ്മ പൊലീസ് ആസ്ഥാനവുമായി ബന്ധപ്പെടുന്നു. ലഭിച്ചത് ഡിജിപി ഡല്‍ഹിയിലേക്ക് പോയെന്ന മറുപടി. ഇതോടെ തട്ടിപ്പുകാരില്‍ അധ്യാപികയ്ക്ക് വിശ്വാസം വരുന്നു. കുരുക്ക് മുറുകുന്നു. പണം നഷ്ടപ്പെടുന്നു.
പിന്നീട് ഹൈ ടെക് സെല്ലിന്റെ അന്വേഷണത്തില്‍ അസം സ്വദേശിയുടെ പേരിലുള്ള ഒരു നമ്പര്‍ ഉപയോഗിച്ചായിരുന്നു വ്യാജ വാട്‌സ് ആപ്പ് അക്കൗണ്ടുണ്ടാക്കി തട്ടിപ്പിന് വിശ്വാസ്യത നേടിയതെന്ന് കണ്ടെത്തി. സൈബര്‍ തട്ടിപ്പുകള്‍ക്ക് എതിരെ വ്യാപകമായി പ്രചാരണം ശക്തമാക്കുന്നതിനിടെയാണ് സംസ്ഥാന പൊലീസ് മേധാവിയെ തന്നെ കരുവാക്കി കേരളത്തില്‍ തട്ടിപ്പ് നടത്തിയിരിക്കുന്നത് എന്നതും ശ്രദ്ധേയമാണ്.
