തൃണമൂല് കോണ്ഗ്രസ് സ്ഥാനാര്ഥി പട്ടിക പുറത്തിറക്കി. നന്ദിഗ്രാമടക്കം 291 മണ്ഡലങ്ങളിലെ സ്ഥാനാര്ഥികളെയാണ് പ്രഖ്യാപിച്ചിട്ടുള്ളത്. സഖ്യകക്ഷികള്ക്കായി മൂന്ന് സീറ്റുകള് വിട്ടുകൊടുത്തതായി മമത അറിയിച്ചു.തെരഞ്ഞെടുപ്പ് നടക്കുന്ന 291 മണ്ഡലങ്ങളില് സ്ഥാനാര്ഥികളെ പ്രഖ്യാപിച്ച് നടത്തിയ വാര്ത്താസമ്മേളനത്തിലാണ് നന്ദിഗ്രാമില് മത്സരിക്കുമെന്ന് മമത ആവര്ത്തിച്ചത്.
സ്ഥാനാര്ഥി പട്ടികയില് 50 പേര് സ്ത്രീകളാണ്. 45 മുസ്ലിം സ്ഥാനാര്ഥികളുണ്ട്. 79 പേര് പട്ടികജാതി വിഭാഗത്തില് നിന്നും 17 പേര് പട്ടികവര്ഗ വിഭാഗക്കാരുമാണ്.294 അംഗ നിയമസഭയിലേക്ക് എട്ട് ഘട്ടങ്ങളിലായിട്ടാണ് തിരഞ്ഞെടുപ്പ് നടക്കുക. മമത സ്ഥിരമായി മത്സരിച്ചിരുന്ന ഭവാനിപുര് മണ്ഡലത്തില് ഇത്തവണ മുതിര്ന്ന തൃണമൂല് നേതാവും മന്ത്രിയുമായ സോവന്ദേബ് ചട്ടോപാധ്യായയാണ് സ്ഥാനാര്ഥി.
തെരഞ്ഞെടുപ്പ് പ്രഖ്യാപനത്തിന് തൊട്ടുമുന്പ് തന്നെ നന്ദിഗ്രാമില് നിന്നാണ് താന് ജനവിധി തേടുക എന്ന് മമത പറഞ്ഞിരുന്നു. തൃണമൂല് കോണ്ഗ്രസിലെ മുതിര്ന്ന നേതാവായിരുന്ന സുവേന്ദു അധികാരി തെരഞ്ഞെടുപ്പ് പ്രഖ്യാപനത്തിന് ആഴ്ചകള്ക്ക് മുന്പാണ് പാര്ട്ടി വിട്ട് ബിജെപിയില് ചേര്ന്നത്. ഇദ്ദേഹത്തിനെതിരെ നന്ദിഗ്രാമില് മത്സരിക്കുമെന്ന് പറഞ്ഞ് വെല്ലുവിളിച്ച മമത ബിജെപിക്കെതിരെയുള്ള പോരാട്ടം അന്ന് കടുപ്പിക്കുകയായിരുന്നു.
