ബുറേവി ചുഴലിക്കാറ്റ് മാന്നാര് കടലിടുക്കില്, തമിഴ്നാട് രാമനാഥപുരത്തിനടുത്ത് വെച്ച് തന്നെ ശക്തി കുറഞ്ഞ് ഒരു തീവ്ര ന്യൂനമര്ദമായി മാറിയതായി കാലാവസ്ഥ വകുപ്പ് അറിയിച്ചു. മാന്നാര് കടലിടുക്കില് എത്തിയ ബുറേവി ചുഴലിക്കാറ്റ് കഴിഞ്ഞ 3 മണിക്കൂറായി രാമനാഥപുരത്തിന് സമീപമായി 9.1° N അക്ഷാംശത്തിലും 78.6°E രേഖാംശത്തിലും തുടരുകയാണ്. ഇത് രാമനാഥപുരത്ത് നിന്ന് 40 കി.മീ ദൂരത്തിലും, പാമ്പനില് നിന്നും 70 കി.മീ ദൂരത്തിലും, കന്യാകുമാരിയില് നിന്ന് ഏകദേശം 160 കി.മീ ദൂരത്തിലുമാണ്. നിലവില് അതിതീവ്ര ന്യൂനമര്ദത്തിന്റെ പരമാവധി വേഗത മണിക്കൂറില് 55 മുതല് 65 കി.മീ വരെയും ചില അവസരങ്ങളില് 75 കി.മീ വരെയുമാണ്. രാമനാഥപുരം, തൂത്തുക്കുടി ജില്ലകളിലേക്ക് പ്രവേശിക്കുന്ന കാറ്റ് കരയിലേക്ക് പ്രവേശിക്കുമ്പോള് പരമാവധി വേഗത മണിക്കൂറില് ഏകദേശം 50 മുതല് 60 കിമീ വരെയും ചില അവസരങ്ങളില് 70 കി.മീ. വരെയും ആയിരിക്കുമെന്നാണ് പ്രതീക്ഷിക്കുന്നത്.
കേരളത്തിനുള്ള മുന്നറിയിപ്പ്
തമിഴ്നാട്ടിലൂടെ സഞ്ചരിച്ച് കൂടുതല് ദുര്ബലമായി ഒരു ന്യൂനമര്ദമായി മാറി കൊണ്ടായിരിക്കും കേരളത്തിലേക്ക് പ്രവേശിക്കുക. കേരളത്തിലേക്ക് പ്രവേശിക്കുമ്പോള് മണിക്കൂറില് ഏകദേശം 30 മുതല് 40 കി.മീ വേഗതയാണ് പ്രതീക്ഷിക്കുന്നത്. തിരുവനന്തപുരം ജില്ലയിലെ വടക്ക് കിഴക്കന് മേഖലയിലൂടെ ന്യൂനമര്ദം അറബിക്കടലിലെത്തും. കേരളത്തില് ഒറ്റപ്പെട്ട ശക്തമായതോ അതിശക്തമായതോ ആയ മഴക്കുള്ള സാധ്യതയുണ്ട്.
ഇനിയൊരു അറിയിപ്പുണ്ടാകുന്നത് വരെ കേരള തീരത്ത് നിന്ന് കടലില് പോകുന്നത് പൂര്ണ്ണമായും നിരോധിച്ചിരിക്കുന്നു. വിലക്ക് എല്ലാതരം മത്സ്യബന്ധന യാനങ്ങള്ക്കും ബാധകമായിരിക്കും. ന്യൂനമര്ദത്തിന്റെ വികാസവും സഞ്ചാരപഥവും വിലയിരുത്തി സംസ്ഥാന ദുരന്ത നിവാരണ അതോറിറ്റി അനുമതി നല്കുന്നത് വരെ കേരള തീരത്ത് നിന്ന് കടലില് പോകാന് അനുവദിക്കുന്നതല്ല.
