തിരുവനന്തപുരം: ലോട്ടറിയുടെ നികുതി വര്ധന ഒഴിവാക്കണമെന്ന ആവശ്യവുമായി കേരളം. ജിഎസ്ടി പരിഷ്കരണം കഴിഞ്ഞ ദിവസം പ്രഖ്യാപിച്ച ലോട്ടറി നികുതി 28 ശതമാനത്തില് നിന്ന് 40 ശതമാനമായി ഉയരും എന്നായിരുന്നു. ഇത് ഒഴിവാക്കണമെന്നാണ് ജിഎസ്ടി കൗണ്സിലില് കേരളം ആവശ്യപ്പെട്ടത്. ലോട്ടറിയില് നിന്നുള്ള നികുതി വരുമാനം വികസന പ്രവര്ത്തനങ്ങള്ക്ക് ഉപയോഗിക്കുകയാണെന്നും കേരളം വ്യക്തമാക്കി.
വരുമാന നഷ്ടം നികത്താന് നഷ്ടപരിഹാര സംവിധാനം വേണമെന്നും സംസ്ഥാനം ആവശ്യപ്പെട്ടിട്ടുണ്ട്. ആവശ്യം അംഗീകരിക്കാത്തതിനെതിരെ കേരളം അടക്കം എട്ട് സംസ്ഥാനങ്ങള് യോഗത്തില് പ്രതിഷേധം രേഖപ്പെടുത്തിയിട്ടുണ്ട്. കഴിഞ്ഞ ദിവസം രാത്രിയോടെയാണ് ജിഎസ്ടി പരിഷ്കരണത്തിന് 56ാമത് ജിഎസ്ടി കൗണ്സില് അംഗീകാരം നല്കിയത്.
സംസ്ഥാനങ്ങള്ക്കും കേന്ദ്രഭരണ പ്രദേശങ്ങള്ക്കും പരിഷ്കാരം മൂലം വലിയ നഷ്ടമുണ്ടാകുമെന്ന് യോഗത്തില് പങ്കെടുത്ത പ്രതിപക്ഷ ധനമന്ത്രിമാര് ചൂണ്ടിക്കാട്ടിയിരുന്നു. ഒരു പഠനവും നടത്താതെയാണ് കേന്ദ്രം പരിഷ്കരണത്തിന് ഒരുങ്ങുന്നതെന്ന് ധനമന്ത്രി കെ എന് ബാലഗോപാല് പറഞ്ഞു. പരിഷ്കരണം മൂലം കേരളത്തിന് 8,000 കോടിയുടെ നഷ്ടമുണ്ടാകുമെന്നും ഇത് നികത്താനുളള നടപടികള് കേന്ദ്രം സ്വീകരിക്കണമെന്നും ബാലഗോപാല് പറഞ്ഞു. നികുതി പരിഷ്കരണത്തിലൂടെ സംസ്ഥാനങ്ങളുടെ വരുമാനം വീണ്ടും കുറയുമെന്നാണ് ആശങ്ക.
നിലവിലെ പരിഷ്കാരം പ്രകാരം ഇനിമുതല് 5 ശതമാനം, 18 ശതമാനം എന്നിങ്ങനെ രണ്ട് ജിഎസ്ടി സ്ലാബുകള് മാത്രമായിരിക്കും ഉണ്ടാവുക. 12 ശതമാനം, 28 ശതമാനം എന്നീ സ്ലാബുകള് ഒഴിവാക്കി. ധനമന്ത്രി നിര്മ്മല സീതാരാമനായിരുന്നു ഇക്കാര്യം പ്രഖ്യാപിച്ചത്. സെപ്റ്റംബര് 22 മുതല് പുതിയ നിരക്കുകള് പ്രാബല്യത്തില് വരും. പുതുക്കിയ പരിഷ്കരണങ്ങള് അനുസരിച്ച് നിത്യോപയോഗ സാധനങ്ങള്ക്ക് വില കുറയും. പനീര്, പാല്, റൊട്ടി, ചപ്പാത്തി, കടല തുടങ്ങിയവയ്ക്കും ജീവന്രക്ഷാ മരുന്നുകള്ക്കും ജിഎസ്ടിയുണ്ടാകില്ല.
