ഭക്ഷ്യ വിഷ ബാധയേറ്റ് പെൺകുട്ടി മരിച്ച സംഭവത്തിൽ മാധ്യമ വാർത്തകളുടെ അടിസ്ഥാനത്തിൽ സ്വമേധയാ കേസെടുത്ത് ഹൈക്കോടതി. സംഭവത്തിൽ സർക്കാർ നിലപാട് അറിയിക്കണമെന്നും ശുചിത്വം ഉറപ്പാക്കാൻ നടപടി ഉണ്ടാകണമെന്നും ഹൈക്കോടതി നിർദേശിച്ചു.
കഴിഞ്ഞ വെള്ളിയാഴ്ചയാണ് കാസർഗോഡ് ചെറുവത്തൂർ ഐഡിയൽ ഫുഡ് പോയിന്റിൽ നിന്ന് ഷവർമ കഴിച്ചവർക്ക് ഭക്ഷ്യ വിഷബാധ ഉണ്ടാകുന്നത്. സംഭവത്തിൽ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ച കണ്ണൂർ കരിവെള്ളൂർ പെരളം സ്വദേശി ദേവനന്ദ മരിക്കുകയും ചെയ്തിരുന്നു. പരിയാരം മെഡിക്കൽ കോളേജിൽ ഐസിയുവിൽ ചികിത്സയിൽ കഴിയുന്ന മൂന്ന് പേരിൽ ഒരു പെൺകുട്ടിയുടെ നില ഗുരുതരമാണ്. ഒരു കുട്ടിയുടെ വൃക്കയ്ക്ക് തകരാറും മറ്റ് കുട്ടിക്ക് ഹൃദയസംബന്ധമായ പ്രശ്നങ്ങളുമുണ്ട്. ഇവരുടെ ചികിത്സയ്ക്കായി അഞ്ചംഗ മെഡിക്കൽ ബോർഡിനെ ചുമതലപ്പെടുത്തി. നാല് കുട്ടികൾ കണ്ണൂർ മിംസ് ആശുപത്രിയിലും ചികിത്സയിലുണ്ട്.
ഇതിനിടെ ഭക്ഷ്യവിഷബാധയുടെ പശ്ചാത്തലത്തില് അനധികൃത ഇറച്ചിക്കടകള്ക്കെതിരെ കര്ശന നടപടിയുമായി രംഗത്തെത്തിയിരിക്കുകയാണ് അധികൃതര്. കോഴിയിറച്ചിയില് അണുബാധയുണ്ടാകുന്നത് ഇറച്ചിക്കടകളില് നിന്നാണെന്ന റിപ്പോര്ട്ടിന്റെ അടിസ്ഥാനത്തിലാണ് നടപടി
ഇതേ സമയം, ഷവർമ നിർമാണത്തിന് ഏകീകൃത മാനദണ്ഡം കൊണ്ടുവരുമെന്ന് ആരോഗ്യമന്ത്രി വീണാ ജോര്ജ് വ്യക്തമാക്കിയിരുന്നു. പലപ്പോഴും പാസ്ചറൈസ് ചെയ്യാത്ത മുട്ടയാണ് ഷവര്മ നിര്മിക്കാനുപയോഗിക്കുന്നതെന്ന് പരിശോധനയില് കണ്ടെത്തിയതായി ആരോഗ്യമന്ത്രി പറഞ്ഞു.
കാസര്ഗോട്ടെ ഭക്ഷ്യ വിഷബാധയില് ഭക്ഷ്യസുരക്ഷാ വകുപ്പ് ഡയറക്ടര് റിപ്പോര്ട്ട് നല്കണമെന്നും നിലവില് ആശുപത്രിയില് ചികിത്സയില് കഴിയുന്ന കുട്ടികള്ക്ക് സൗജന്യ ചികിത്സ നല്കുമെന്നും വീണാ ജോര്ജ് പറഞ്ഞു.
