മലബാര് ക്രിസ്ത്യന് കോളേജിലെ ഉത്തര് പ്രദേശ് സ്വദേശിയായ വിദ്യാര്ത്ഥി ജസ്പ്രീത് സിംഗിന്റെ മരണവുമായി ബന്ധപ്പെട്ട് കോളജില് വിദ്യാര്ത്ഥികളുടെ പ്രതിഷേധം തുടരുന്നു. കോളജ് പ്രിന്സിപ്പലിനെ കെഎസ്യു പ്രവര്ത്തകര് ഓഫീസിനുള്ളില് പൂട്ടിയിട്ടു. എസ്.എഫ്.ഐ പ്രവര്ത്തകരും പ്രതിഷേധവുമായി എത്തി.
അതേസമയം സഹോദരന്റെ മരണത്തില് കോളജ് അധികൃതര്ക്ക് പങ്കുണ്ടെന്നും കോടതിയെ സമീപിക്കുമെന്നും സഹോദരി മനീഷ പ്രതികരിച്ചു. പ്രിന്സിപ്പലും എക്കണോമിക്സ് ഡിപ്പാര്ട്ട്മെന്റും പക്ഷപാതം കാണിച്ചു. രണ്ടുതവണ കണ്ടോനേഷന് അനുവദിക്കാമെന്ന് ചട്ടം ഉണ്ടായിട്ടും പ്രിന്സിപ്പല് മറച്ചുവെച്ചു. ജസ്പ്രീത് സിംഗ് നാലാം സെമസ്റ്ററില് മാത്രമാണ് കണ്ടോനേഷന് അപേക്ഷ നല്കിയത്. നീതി തേടി മുഖ്യമന്ത്രിയെ സമീപിക്കുമെന്നും സഹോദരി മനീഷ പറഞ്ഞു.
വിദ്യാര്ത്ഥിയുടെ ആത്മഹത്യയുമായി ബന്ധപ്പെട്ട് കേരള സംസ്ഥാന യുവജന കമ്മീഷന് സ്വമേധയാ കേസെടുത്തിട്ടുണ്ട്.
