ലഖ്‌നൗ: ഹാത്രാസില്‍ കൂട്ടബലാത്സംഗത്തിനിരയായി കൊല്ലപ്പെട്ട പെണ്‍കുട്ടിയുടെ കുടുംബത്തെ കാണാനായി കോണ്‍ഗ്രസ് നേതാവ് രാഹുല്‍ ഗാന്ധി ഉച്ചയോടെ പുറപ്പെടും. ഹാത്രാസിലെ കുടുംബത്തെ സന്ദര്‍ശിക്കുന്നതില്‍ നിന്നും തന്നെ തടയാന്‍ ഒരു ശക്തിക്കും സാധിക്കില്ലെന്നും കുടുംബത്തെ കണ്ടിരിക്കുമെന്നും രാഹുല്‍ പറഞ്ഞു
രാഹുൽ എത്തുന്നതിനു മുന്‍പ് പ്രദേശത്ത് കനത്ത പൊലീസ് വിന്യാസം ഒരുക്കി യു.പി സര്‍ക്കാര്‍. ഹാത്രാസിലെ ബൂള്‍ഗാര്‍ഹി ഗ്രാമത്തിന് പുറത്തായാണ് പൊലീസുകാരെ വിന്യസിച്ചിരിക്കുന്നത്.
ഇത് രണ്ടാം തവണയാണ് രാഹുല്‍ പെണ്‍കുട്ടിയുടെ കുടുംബത്തെ കാണാനുള്ള ശ്രമം നടത്തുന്നത്. പ്രിയങ്ക ഗാന്ധിയുള്‍പ്പെടെയുള്ള കോണ്‍ഗ്രസിലെ ചില നേതാക്കള്‍ക്കൊപ്പമാണ് രാഹുല്‍ ഹാത്രാസിലേക്ക് വരുന്നത്.
അതേസമയം ഹാത്രാസില്‍ മാധ്യങ്ങളെ അനുവദിച്ചതായി സദാര്‍ എസ്.ഡി.എം പ്രേം പ്രകാശ് അറിയിച്ചു. പ്രത്യേക അന്വേഷണ സംഘത്തിന്റെ അന്വേഷണം അവസാനിക്കുന്ന മുറയ്ക്ക് മാധ്യമങ്ങള്‍ക്കുള്ള നിയന്ത്രണം എടുത്തുകളയുമെന്നായിരുന്നു അദ്ദേഹം പറഞ്ഞത്.
