പത്തനംതിട്ട:മണ്ഡലകാലത്ത് ശബരിമലയില് വരുമാന വര്ധന. കഴിഞ്ഞ വര്ഷത്തേക്കാള് 82 കോടിയുടെ അധിക വരുമാനമാണ് ദേവസ്വം ബോര്ഡിനുണ്ടായത്. കാണിക്ക ഇനത്തിലും, അരവണ വില്പനയിലും വരുമാനം കൂടി. കഴിഞ്ഞ മണ്ഡല കാലത്തേക്കാള് നാല് ലക്ഷത്തോളം ഭക്തരാണ് ശബരിമലയില് ഇത്തവണ അധികമായി എത്തിയതെന്ന് ദേവസ്വം ബോര്ര്ഡ് പ്രസിഡന്റ് പിഎസ് പ്രശാന്ത് പറഞ്ഞു.
നവംബര് 15 മുതല് ഡിസംബര് 26 വരെ നീണ്ട 41 ദിവസത്തെ മണ്ഡലകാലത്ത് 297 കോടി രൂപയുടെ വരുമാനമാണ് ദേവസ്വം ബോര്ഡിന് ഉണ്ടായത്. കഴിഞ്ഞ വര്ഷം ഇത് 215 കോടിയോളമായിരുന്നു. അധിക വരുമാനമായ 82 കോടിയില് കൂടുതലും അരവണ വില്പനയിലൂടെയാണ് ലഭിച്ചത്. കഴിഞ്ഞ സീസണിനേക്കാള് 22 കോടിയുടെ അരവണ അധികമായി വിറ്റു. കാണിക്കയായി ലഭിച്ചത് 80 കോടിയിലേറെ രൂപയാണ്. പതിമൂന്ന് കോടിയുടെ വര്ധനവാണ് ഇതിലുണ്ടായിരിക്കുന്നത്.
മണ്ഡലകാലത്ത് സന്നിധാനത്ത് എത്തിയ ഭക്തരുടെ എണ്ണത്തിലും മുന് വര്ഷങ്ങളെക്കാള് വര്ധനയുണ്ടായി. 32.5 ലക്ഷത്തോളം പേരാണ് ഇത്തവണ ദര്ശനം നടത്തിയത്. കഴിഞ്ഞ തവണ ഇത് 28 ലക്ഷമായിരുന്നു. സ്പോട്ട് ബുക്കിംഗിലുടെയും പുല്ലുമേട് വഴിയും ശബരിമലയില് എത്തിയവരുടെ എണ്ണവും കൂട്ടിയിട്ടുണ്ട്.
